Giovan Battista Perasso

Quest articol chì l'è scrivuu in lombard, grafia milanesa.

El Balilla, nomìgnol del Giovan Battista Perasso (Genova, 1735 – Genova, 1781), l'è el bagaj che l'ha daa el via a la rivolta di Genovês contra i occupant austro-piemontês ai temp de la Guerra de Succession Austriaca, el 5 december 1746. Anca se l'è on personagg stòrich, se sa praticament nagott de la sò vita a part el sò roll in de l'insurrezzión.

Contest

Durant la Guerra de Succession Austriaca, i trupp de l'Austria e del sò alliaa el Regn de Sardègna han invaduu la Republica de Genova e han occupaa l'istessa cittaa de Genova nel december del 1746. I occupant han toeu foeura de la cittaa on fracch de danee et han trattaa mal la populazzión.

I fatt

El 5 de dicember del 1746 di artilliee austrìach eren adree a tirà giò ona batteria de canón dai fort in sui collin a la cittaa, quand vun di quej canón el s'è trovaa bloccaa in de la palta nel quarter de Portoria. I soldaa se sont mettuu a frustà i gent che ghe staven intorn per obligài a iudà a tirà sù el canón. A quel punt el Balilla l'ha toeu sù on sass, l'ha vosaa "Che l'inçe?" ("Gh'emm de comincià?" in lengua genovesa) e l'ha tiraa el sass ai austrìach. L'è staa quell el cominciament de l'insurrezzión.