Giovanni Zantedeschi
|
|
Chest artícol a l'è scricc in Lumbàrt, ortograféa orientàl unificàda. |
Giovanni Zantedeschi (Molina di Fumane (VR), 3 de màgio del 1773; Böegn (BS), 16 de màgio del 1846) l'è stat en dutùr e 'n botànich italià.
El g'ha stüdiàt a Verùna e piö tàrde a Pàdova, endóche 'l s'è laureàt con màsim unùr en Midizìna e 'n Chirugìa.
El g'ha finìt el sò tirocìnio a Verùna, e 'l g'ha ezercitàt la sò profesiù per en pó de tép a Tremùzen, endèl Alt Gàrda e dòpo a Böegn en àlta Val Trómpia, enfìna a che l'è mórt endèl 1846.
Apasiunàt de botànica, el g'ha püblicàt dés lìber sö la flòra de la pruvìncia de Brèsa.
L'ìa sòcio del profesùr Ciro Pollini (1782 - 1833), botànich de Verùna, autùr de la 'mportànte Flora Veronensis.
El g'ha ìt 'na corespondènsa scentìfica 'mportànte col botànich todèsch Kurt Sprengel (1766 - 1833) che, come recunusimènt per i sò stüde, el g'ha dedicàt en zèner de la famìa de la Araceae, e 'l l'ha ciamàt Zantedeschia.
Zantedeschi el scoprés e 'l descrìf el Laserpitium nitidum, de la famìa de le Apiaceae. L'è stat el prìm botànich a descrìer la Saxifraga arachnoidea, scuprìda endèl 1804 del botànich céco Kaspar Maria von Sternberg (1761 - 1838).
Molina, el paés endóche l'è nasìt, la g'ha dedicàt el Muzèo Botànich de la Lesìnia de Molina endóche vé conservàt trezènt spéci de la flòra del altipià dei Mucc Lesìni con divèrsi campiù de orchidèe.