Isepp Parin

Quest articol chì l'è scrivuu in lombard, grafia milanesa.

L’Isepp Parin (italian: Giuseppe Parini; Bosis, 23 de magg del 1729 - Milan, 15 de agost del 1799) l'è staa on poetta e abaa italian.
A l'è staa on member de l'Academia di Trasformaa, e vun di pussee important esponent italian del Neoclassicism e de l'Iluminism.
Anca se l'è cognossuu soratutt per la soa atività letteraria in italian, el Parin l'ha scrivuu anca quatter poesij in lombard, e per quest l'è consideraa del Carlo Porta vun di cinch omenoni de spallera de la letteradura milanesa.

La considerazion de la nobiltà

La statoa del Parin al Cordus (Milan).

A differenza di illuminista franzes, Parin l'era a favor de l'esistenza de la nobiltà, ma l'era contrari al sò comportament, parassitari e senza nissuna utilità per la società. In la sò oeuvra Il Giorno el da 'n imagen de la nobiltà gramma, cont ona vita voeuja, inutil e superficial.

Voreva favorì el tornà a voltra de la veggia nobiltà: Minga de sangh ma ciappada grazia ai virtù e ai robb faa, e che la fasess di azion bònn e util per la società indoa viveven.

Parin e 'l Lombard

Anca se principalment cognossuu per la sò letteradura in italian, l'ha faa tanta anca per la lengua lombarda.

L'era in d'ona Academia che la voreva favorì la poesia in dialett milanes, e l'era anca content de la soa esistenza e pensava che 'l facc che la fuss doperada del popol l'era assee per nobilitàlla.

Produzion in Lombard

Parin l'ha scrivuu di poesij in lombard, la pussee famosa, in mort de Domenegh Balestrer, l'è dedicada propi a l'autor meneghin.

Sta flutta milanesa on gran pezz fa
L’era del Magg; e pœù la capitè
A duu o trii d’olter, ma de quij che sa
Sonà una flutta cont el sò perchè.

Lor pœù morinn, e questa la restè
A Meneghin ch’el l’ha savuda fà
Rid e fà piang con tanta grazia chè
L’è ben difficil de podell rivà.

Anca lu pien de meret e de lod
Adess l’è mort; e quell bravo istrument
L’è restaa là in cà soa taccaa su a on ciod.

Ragazz del temp d’adess tropp insolent,
Lassell stà in dove l’è; no ve fee god,
Chè per sonall no basta a boffagh dent!

Riferiment

Giuseppe Parini - Treccani

Interprogett

lmo.Wikisource

In morte del curato Ciocca

Magon dij damm de Milan per i baronad de Franza