Glucosa
|
Quell articol qì l'è scrivud in Lombard, cond l'ortografia Scriver Lombard. |
La glucosa l'è un zœqer semplex cond formula molecolara C6H12O6, qe vœl dir qe l'è faita sœ de ses atom de carbone, dodes atom de idrojen e ses atom de ossijen. La glucosa la circola ind el sang dei anemai, e la misura de qella quantità qé la se ciama glicemia. La glucosa la ven faita sœ ind la fotosintesis clorofilliana de l'aiva e l'anidrid carbonega, e l'enerjia qe la serv per far-la sœ le piante i la ciapa de la lus del sol. L'è la sortia de enerjia plœ importanta per la respirazion cellulara; la glucosa l'è stipada 'me polimer, ind le piante 'me amid e ind i anemai 'me glicojen. Cond i so ses atom de carbone, la ven classifegada 'me una exosa, una sotacategoria de monosacarids. La D-glucosa l'è vœna dei sedes isomer de qella molecola qé; la D-glucosa, qe la se ciama anca destrosa, l'è qella qe se trœva in natura, menter la forma L-glucosa se la cata miga mai ind natura. La glucosa la se pœl otegner de l'idrolisis dei carboidrads, 'me el zœqel del lait (latosa), el zœqer de cana (sacarosa), maltosa, cellulosa, glicojen, etc.
