Haddaway

Quel articul chì l'è scrivüü in Lumbard, cun l'urtugrafia insübrica ünificada.

Alexander Nestor Haddaway, cugnusüü dumà cumè Haddaway (Trinidad, 9 genar 1965) l'è ün cantant de müsica dij discotech (gener ciamàa Eurodance) nasüü in Trinidad e Tobago. L'è diventàa famùs in del 1993 cunt la canzùn What is Love ("Se l'è cusè l'amur"), che la gh'ha avüü ün frach de success in tücc el mund.

Biugrafia

A l'inizi

Haddaway l'è nasüü da pà ulandes ch'el stüdiava i uceani e da mama trinidegna che la fava l'infermera. Dopu che i sò genitur gh'han divurziàa, a l'inizi dij Ann Setanta, l'è nàa a viver in Europa cunt el sò bap. Finìi i scoeul, l'è turnàa a viver cunt la mama in dij Statt Ünii, in duvè gh'ha finìi de stüdià.
In del 1989 l'è turnàa in Europa, precisament a Culonia (Germania), in duvè l'ha cuminciàa a laurà cumè cureograf e tapezee e a fà müsica quand gh'aveva temp liber a disposiziùn.

Cariera

Haddaway/The Album

In del 1992 Haddaway l'ha firmàa ün cuntrat cunt la casa discugrafica tudesca "Coconut Records".
Ün ann pussee tard l'è surtìi el sò prim disch, Haddaway/The Album. La prima canzùn che l'è vegnüda foeura, What is Love, la gh'ha avüü ün success esageràa in tücc el mund; l'è rivada in de la prima pusiziùn dij clasifich d'ün frach de Paes: Italia, Svizzera, Austria, Irlanda, Danimarca, Finlanda, Nurvegia, Germania, Francia, Spagna, Belgi, Paes Bass, Lettonia, Israel e Messich. La canzùn What is Love l'è cunsiderada anca incoeu vüna dij pussee bej canzùn de stil Eurodance.
Anca i olter canzùn tiràa foeura de Haddaway/The Album gh'han avüü success: Life ("Vida"; prüma posiziun in Spagna e Svezia), I Miss You ("Mì te perd") e Rock Your Heart ("Dach üna scossa al tò coeur").
A la fin 'st'album chì l'ha vendüü ün frach de miliùn de copj.

The Drive

In del 1995 l'è stàa publicàa el segund album de Haddaway, ciamàa The Drive ("La guida"). La prima canzùn tirada foeura da 'stu disch chì, Fly Away ("Vula via"), l'ha avüü ün bun success anca in Italia.
Olter canzùn del disch i eren Catch a Fire ("Piglia ün foeugh") e Lover Be Thy Name ("Amatùr ch'el sia'l tò nom").

Let's Do It Now

In del 1998 l'è surtìi el terz album de Haddaway, Let's Do It Now ("Fàmul adèss"), che l'era cumpletament diferent dij quej de prima: l'era ün disch fàa per la magiùr part da canzùn de müsica soul, minga de Eurodance; inscì, el gh'ha avüü minga success.

Ültim apariziùn e laurà

Dopu ün frach de temp, Haddaway l'è cumpars de noeuf in televisiùn, in del 2004, dürant ün prugrama tudesch ciamàa Comeback reality television show. In del 2005 l'è cumpars anca in d'ün prugrama ingles simil, Hit Me Baby One More Time e in del prugrama americàn cunt l'istess nom.
In del mag 2008 l'ha publicàa la canzùn I Love the 90's ("I me piàsen i Ann Nuvanta"), cantada insèmm a Dr. Alban, olter cantant famùs de müsica Eurodance dij quej ann lì.

Discugrafia

Album

Haddaway logo

1993 Haddaway/The Album
1995 The Drive
1998 Let's Do It Now
1999 All The Best His Greatest Hits
2001 My Face
2002 The Greatest Hits
2002 Love Makes
2004 What Is Love - The Greatest Hits
2005 Pop Splits
2007 Crucified

CD singul

1993 What Is Love
1993 Life
1993 I Miss You
1994 Rock My Heart
1995 Fly Away
1995 Catch A Fire
1995 Lover Be Thy Name
1997 What About Me
1998 Who Do You Love
1998 You're Taking My Heart
2001 Deep
2002 Love Makes
2003 What Is Love Reloaded
2005 Spaceman
2005 Missionary Man
2007 Follow Me
2008 I Love The 90's (insèmm a Dr. Alban)

Culegament

Sitt de Haddaway Arqiviad qé: [1]