Imbasciada de facto

Quest articol chì l'è scrivud in lombard, con la Noeuva Ortografia Lombarda

Per imbasciada de facto se intend un ofizzi o delegazzion che la gh'ha el roeull de 'n imbasciada de facto, senza però vesser recognossuda 'me tala de jure, roba che la capita despess quand che du Pais gh'hann minga di relazzion diplomateghe o in cas di Stat a recognossiment limitad.

La delegazzion de Taiwan in del Somaliland, l'unegh Stat recognossud de nissun

A segonda di cas, la po havégh anca di dirit de extraterritorialità e quei che ghe lavoren dent 'n imunità diplomatega. Despess, quand che di Pais s'cepen i so relazzion, a l'è l'imbasciada de 'n Stat che l'è amis de tucc e du, l'inscì ciamada potenza protetora, che la ciapa la responsabilità de tegnì 'sti relazzion e se la gh'ha una sezzion con di diplomategh acreditad despess l'è vista anca lee 'me 'n imbasciada de facto.

I esempi pussee famos inn i delegazzion de Taiwan, che despess goden de 'n bon suport del Stat che i ospita, i delegazzion di do Germanie prima che se recognosseven 'me di Stat, i delegazzion de la Rhodesia dopo de la deciarazzion unilateral de independenza e di Bantustan del Sudafrica e anca la delegazzion de la China a Hong Kong, che formalment a l'era un ram de l'agenzia de stampa Xinhua.

Riferiment

• Glossari diplomategh

Vos corelade

• Volt comissariad (Commonwealth)
• Paradiplomazzia
• Ofizzi de representanza