Wikipedia

Isola Comacina

Lombard Quest articol chì l'è scrivud in lombard, con la Noeuva Ortografia Lombarda

L'isola Comacina a l’è on tochell de terra (longhezza 600 m, larghezza 200 m, perimetro 2 km, superfice 7,5 etari) circondad del lagh de Com.

L’è situada in del comun de Tremezzina, in corrispondenza de la zoca de la costa ocidental del ram comasch del lagh infra Argegn e la penisola de Lavedo, ciamada Zoca de l'oli: a l’è vun di territori pussee a nord de l'Italia indove, in d’ona condizzion climatica particolarment bona, a l’è coltivad l'oliv e l’è prodot l’oli d'oliva. I abitant de Ossusc i la ciamen an’mò el castell [1].

El proprietari vegg, el Giuseppe Caprani, el gh'’ha lassad l'isola in eredità al re Albert I del Belgi, che a ghe l’ha dada in regall al Stat italian.El stat italian poeu el ghe l'ha ceduda, a soa volta, al president de l'Academia de Brera cont el fin de tirà su on paesin per i artista e on albergo. Al dì d’incoeu l'isola l’è de proprietà de l'Academia de Brera, a Milan[2].

Tucc i ann, la domenica pussee vesina al 24 de sgiugn, ghe se svolg la festa tradizzional de san Sgiovann, cont ona procession solene de barche e cont el spetacol pirotecnich tradizzional in sul lagh.

Descrizzion

Modifega

De là di poche costruzzion recente, l'unich edifizzi ancamò intat a l’è la picola gesa baroca de San Sgiovann che la gh’ha dent di rest de muradure romane e d’ona torr tardoromana, olter a ona part di fondazzion d’ona capella romanica[3] e di rest d’on batisteri (mosaich[4]) del quint secol.[3]
Tacad a questa costruzzion chì a gh’è, de là di ruvine forsi d’on batisteri a abside dopia tirad in pee dopo el V secol,[3] anca i rest de la basilica de Sant'Eufemia[5] del XI secol, con la pianta a trè navade con di absidi con cripta. In su l’isola se poden vedé i rest di gese di Santa Maria del Portich (XII secol, metuda adree al senter che ‘l part di rest de la basilica antica e ch’ el va inanz adree a la dorsal in direzzion ocidental[3]), de San Peder in Castell (XII secol, in del pont pussee alt de l'isola, indove forsi se trovava ona fortificazzion[3]) e di Sant Faustino e Giovita (XII secol[3])[6].[1]
Second la tradizzion, in su'l'isola esisteven noeuv gese, inanz che i comasch, in de l’ann 1169, je rasassen al soeul.

L'interpretazzion de l'agetiv "comacina" l'è discussa. De solit a l’è interpretad come "de Com" o "del lagh de Com", donca come "isola del lagh de Com". Di autor de poch temp fa fann vegnì sgiò l'agetiv de "νήσος κωμανίκεια"; l’isola a l’è stada ciamada inscì del Sgiorg Cipri[7] in la soa opera geografica, quand che minzona l’ impero bizantin e la resistenza del Francione (magister militum del VI secol)[8].

Storia

Modifega

I lit sora i origin e ‘l rivà di Langobard

Modifega

Second el Ballarini[9] i prime fortificazzion sarissen stade costruide di Gai e poeu di Roman. Al dì d’incoeu a gh’hem minga de testimonianze archeologiche preromane, poch tochei architetonich roman poden fa pensà a on edifizzi piscinin (forsi on picol templi votiv) o adritura di ruvine che a inn vegnude d’on alter sit e poeu a inn stade drovade lilinscì.[10]. Ma tegnom minga foeura l’ipotesi che el toponim castell anca el poda vesser correlad cont ona utilizazzion in era preromana de l'isola come castrum o ben ultim post de rifugiàss in cas de pericol de la comunità vicana di Ausuciates (i abitant antich de l’Ossusc d’incoeu) che l'era lì adree.

Second la letera de l’ Ennodio al Faust[11] del 501 l'isola la par desabitada, priva de fortificazzion e drovada come isolament de l'area vesina, a Spuran (frazzion de Ossusc), drovada come lebrosari (propi per la cura di spurii).

On'interpretazzion sbajada de la letera[12] scrivuda in del 550 del Florian a Nicezio, Vescov de Trevir l’ha fad creder che l'isola Comacina la fudess ciamada Cristopoli o Cresopoli e che la fudess sota l’influenza franca. A l’è oramai in ciar che l'isola argoment de la letera a la qual el Florian el se riferìss a l’è l'isola de Lerio a Cannes in Provenza[13].

Tante iscrizzion epigrafiche trovade in su l’isola olter che a Lenn e a Com ne insegnen la presenza de fortificazzion in su l'isola Comacina e ne atesten che a la fin del regn gotich tuta la region del lagh de Com l’è restada sota el governa de Bisanzi. De fat i iscrizzion riporten la data de l'impero e l'indicazzion consiliar del Basili, del Paolin e del Sgiovann. Di indagen archeologiche de poch temp fa hann mostrad che l'isola l’è stada fortificada in del cors del VI secol[14].

 
L'isola Comacina, la penisola de Lavedo e la Zoca de l'oli

Second tanti, la font bibliografica principal a proposit de la fortificazzion de l'isola in del VI secol sota el domini bizantin la sariss el pass del Paolo Diacono (III, 27) second el qual per vint ann el in Insula Amacina, el Francionem magistrum militum l’è restad el padron assolut e per ses mes l’ha resistid a l'assedi langobard. A In de l’invader l'Italia, i Langobard hann conquistad Milan in del 569 e hann costrinsgiud la class dirigenta e i possessores a scapà via e cercà protezzion. A inn nancamò ciar el territori e i termen de questa ultima propagin resistenta de Imper bizantin in terra langobarda anca quand che i comunicazzion con Bisanzi ormai a eren impossibil. I baluard del Francion eren minga domà in su l’isola. El sudiacon de la gesa milanesa in del castell de Laino, el Marcellin, el tegniva d’oeugg la Vall d'Intelv. A sud el podeva cuntà in sul Castell Baradell e in su la cità de Com, Castel Mart col Bus del piomb difendeven la Valassina, inveci i fortificazzion di Lech-Civaa controllaven l'orient larian. A nord i pass alpin eren difendud ben di Franch e insema a lor a gh’era ona alleanza streccia. A gh’è ancamò la quistion intra i storich a proposit del Burgus Francionis situad in del Pian de Spagna, o ben se i terre in scima al lagh sien stade sota ‘l contoll diret del Francion opur di Franch (Burgus Francorum). La resistenza del Francion l’è terminada in del 588 quand che l'armada langobarda de l’Autari, elesgiud in del 584, l’ha conquistad i fortificazzion. El Francion l'ha podud tornà indree a Ravenna cum uxore et suppellectili. El Paolo Diacono el dis anca che

Però a l’è anca necessari meter in vista che, second on studi del 2016[15], l'isola Comacina che i sò vicende a inn cuntade su in la Historia Langobardorum del Paolo Diacono in realtà la sariss nò questa isola chì, ma ona porzion de territori compresa in fra du fium che confluissen, che la podariss vesser la frazzion Capiaa del dì d’incoeu del comun di Olginaa (LC). Ven de conseguenza che i aveniment de epoca langobarda descrivud chichinscì sarissen de trasferì in quella località olginatesa là. L’imbrojàss infra isola comense (quella tremezzina) e isola comacina (quella del Paolo Diacono) el risalissariss ai erudita del setcent, e in seguit el sariss deventad solit.

I fortificazzion de Comacina a inn anca stade minzonate del Sgiorsg Cipri[16].

 
I ruvine de la basilica de Sant'Eufemia.

In tute i manere, anca ‘l territori del Lagh de Com l’è borlad in di man di Langobard, anca se minga a l'istessa manera di alter desgià che facilment l'è minga stad sachegiad, ma conquistad in guerra regolar[17].

Ma l'isola Comacina, in del VI secol, l’è stada minga domà 'l center de vicende politiche e militar, ma anca religiose.

La tradizzion la ne tramandà la vos de la presenza stabil de l’sant Abondi, forsi giamò present a la fondazzion de la basilica de sant'Eufemia, in del 1031, fada del vescov Litigerio. Ma questa presenza chì a l’è minga confermada diversament sia perché in del 501 in su l’isola ghe stava de cà nanca ona persona, come l’è riportad de l’Ennodio, sia perchè l'azzion missionaria del sant Abondi l’era ancamò concentrada in l’ambient de la cità de Com.

L’Agripino inveci l’ha catad foeura 'me center de la soa atività l'isola Comacina, indove l’ha alca volsud vesser miss sot terra. El vescov Agripin, che l’è cuntad in tra i sant anca se l’era tirad dent in del scisma di trii capitoi, scisma che la gesa de Com la ghe se sgiontarà fina a l’acord del 698, l’ha fad tirad su e l’ha consacrad on opus, probabilment la gesa che lu 'l gh'ha intitolad a sant'Eufemia. Questa santa chì l’era ritegnuda di tricapitolit ona bandera perchè in d’ona gesa consacrada a lee s’è tegnud el IV concili de Calcedonia indove propi l’Abondi l’è stad protagonista. Per quest se gh’ha de considerà che la legenda de la presenza de Abondi in su l’isola la sia nassuda propi chchinscì, forsì perchè l’Agripin l’ha dotad la gesa de reliquie del sant che l'era stad vescov prima de lu. Ona basilica de Sant'Eufemia noeuva (de la qual incoeu resten domà di rest diroccad) l’è stada tirada su ancamò in del XI secol dal vescov Litigerio, in ocasion de la sistemazzion de la diocesi che l’ha menad a elevà la gesa al rango de gesa de la piev.

Di Langobard a la distruzzion de l'isola

Modifega
 
L'isola Comacina, estremità setentrional

Passada in di man di Langobard, l'isola Comacina l’è deventada fortificazzion de la soa ocupazzion militar de lor, arenta a la soa sede aministrativa de lor testimoniada del toponim Sala, che ‘l sugeriss el sit de racolta di contribuzzion de pagàgh ai conquistador[18].

El territori del Lagh de Com l’è stad metud sota la giurisdizzion del duca de Bergom. Quest el ne tira a suponner che la disfata di Bizantit del Francion la gh’haveva de vesser suceduda per opera di Langobard di quell ducad là[19]. La cità de Com, sgià municipium romanum, l’è stada agregada a Milan, probabilment perchè i Langobard milanes eren stad quei che haveven compid l'azzion di atach a partì del sud fina a conquistà la cità. Com l’è restada sota Milan per i secoi adree, fina al fiorì del podé temporal di vescov.

In del 591 l’Agilulfo, apena elesgiud successor de l’Autari,l’ha comenzad el so regn cont el purgà di duca che haveven tradid. El Mimulfo, probabilment duca de San Giuli, che ‘l s’era refugiad in su l’isola d'Orta, l’è stad fa sortì del sit indove che l'era scondud e copad. El duca de Bergom Gaidulfo el s’è refugiad in su l’isola Comacina che l’è stada tacada ancamò e conquistada in combatiment. El Gaidulfo l’ha otegnud la grazzia.

In del 690 el Cunipert l’ha podud refugiàss chichinscì dopo la ribellion del duca de Trento Alachis. Cont el sostegn di fradei Aldo e Grauso de Bressa l'ha riconquistad el regn a Cornaa.

In del 701 l’Ansprando, tutor del bagai Liutberto, fioeul successor del Cuniberto, l’ha costruid di fortificazzion lilinscì. L’ha riessid a slisà la vendeta de l’Ariperto II duca de Turin a scapà via per la strada per Ciavena e per la Baviera sota la protezzion di Franch, intanta che ‘l Liutberto l'era brancad e ‘l duca de Bergom Rotarit batud. L'isola Comacina l’ha subid ancamò l'invasion e la distruzzion.

 
La gesa di san Sgiovann in su l’isola Comacina

A la fin del prim millenni, l'isola Comacina l’è stada de noeuv al center de vicende internazionai. In di sò fortificazzion s’eren refugiad i partesan del Berengari II, el fioeul Guido, el cont Nantelmo de Castell Sevar e’l cont Aton de Lech . A inn stad tacad del Vescov de Com Waldone, allead di Otton I de Sassonia e l'isola l’è stada rasada al soeul de noeuv. Com l’ha otegnud la sgiurisdizzion sora tut el lagh de Com e sora quell de Mezzoeula. Sti privilesg chì a inn stad confermad de l'Oton II in del 977, de l' Arduin in del 1002 e del Corrado II in del 1026.

La rivalità intra Com e Milan per la superiorità e ‘l controll di vie de comunicazzion e di pass alpin l’ha menad in del 1118 a on conflit decennal, ciamad propi guerra decennal. A inn stade tirade dent in del conflit minga domà i dò cità, ma anca squas tute i terre de lagh de Com che s’eren s’cerade contra Com. Per l'isola, descrivuda de l’Anonimo Cumano come on oppidum[1], i vicende di batalie in del cors de la guerra a inn stade di volte bone e di volte cative. L’isola l’ha subid dò volt el pesg di comasch: in del 1119 a inn stad distrut la soa flota e’l paes de Campo, incoeu frazzion de Lenn, in su la terraferma e in del 1124 l’è stada ocupada l’isola.

El conflit l’è finid in del 1127 con la vitoria dei milanes e la distruzzion completa de Com. Dopo la batuda, Com l’è risorsgiuda a partì di sò ruvine e, anca grazzie a l'aleanza cont el Federigh Barbarossa, l’ha paregiad la rivincita che l’ha menad in del 1169 a la vendeta,[5][20] jutada di trè piev (Dongh, Gravedona e Soeurich), contra i le terre ribelle. L’isola in particolar l’è stada rasada al soeul; tucc i presidi, i cà, i gese e i mura a inn stad abatud e i sass a inn stad spantegad in del lagh per fa in manera che la podess pu vess tirada in pee. L'unich edifizzi che l’è stad risparmiad l’è stad un'abazzia di moneghe benedettine,[1] cont on picola gesa dedicada al San Sgiovann Batista[20]. El vescov de Com Vidulfo l’ha scomunicad l'isola[21]. Cont on decret imperial del 1175, El Federigh Barbarossa l’ha confermad la proibizzion de tiràlla su ancamò: «Sonarà pu i capane, se metarà pu preja in su preja, nissun el ghe farà mai pu l’ost, se de nò el sarà copad con violenza».

 
L'isola Comacina (ciamada Isola de San Giovanni) in d’ona pitura del Johann Heinrich Bleuler (1830), Biblioteca nazzional svizzera

i abitant inn scapad via a Varenna,[5][20] in su la riva inversa del lagh, che de conseguenza per on certo temp l’è stada ciamada Insula nova (isola noeuva).

De allora, in su l'isola Comacina a gh’è pu stad de cà nissun, domà in del secol quell di derset l’è stada fada su ona picola gesa dedicada a san Sgiovann che ‘l gh’ha anca dad ‘l nom de san Sgiovann a l'isola medema olter a quell de castell.

Anca incoeu ogni ann se fa memoria quest aveniment tragich chì el sabet e la domenica de la setimana che la gh’ha dent el 24 de sgiugn, festa de San Sgiovann. El lagh l’è inluminad a giorno con miare de lumaghitt, che a inn di lumit che galesgen bandonad in su l’aqua, come per ricordà i anime derelite che hann navigad d’ona riva a l’altra, in del scapà via di sò cà ‘dree a brusà. On spetacol pirotecnich el fa memoria del foeugh e de la distruzzion de l’isola.

De la distruzzion al dì d’incoeu

Modifega

Prima de proprietà vescovil, in seguit l'isola l’è passada in di man de tanti proprietari.

In del 1919 la gh’è stada lassada in eredità d’on certo Augusto Caprani de Sala al re Albert I del Belgi,[22] che in del 1920 ghe l’ha ceduda al Stat italian,[22] atravers ona persona giuridica che i sò cap eren el Consol dl Belgi e ‘l president dell'Academia de Brera,[5][22] cont el fin de costruì on paesin per i artista[22] e on albergo. L'albergo l’è mai stad fad su; però a inn stade tirade in pee, olter a la locanda in del 1964, anca tre villete in del 1939 su proget de l'architet Peder Lingeri[23] metude denter ben in de l’ambient de l'isola e oget de amirazzion ancamò adess.

Galeria d'imagin

Modifega
  •  
    Veduda sgeneral del Lagh
  •  
    Vista vers Bellas
  •  
    Vista de Perled
  •  
    Vista aerea
  •  
    Qauder piturad

Note

Modifega
  1. ↑ 1,0 1,1 1,2 1,3 Belloni et al., p. 27.
  2. ↑ Giovanna D'Amia, L'isola degli artisti: un laboratorio del moderno sul Lago di Como, Sesto San Giovanni, Mimesis, 2005. 978-8-88-483351-8
  3. ↑ 3,0 3,1 3,2 3,3 3,4 3,5 TCI, Guida d'Italia [...], p. 301.
  4. ↑ AA.VV., Una chiesa tra lago e montagne, p. 121.
  5. ↑ 5,0 5,1 5,2 5,3 TCI, Guida d'Italia [...], p. 300.
  6. ↑ Chiesa dei SS. Faustino e Giovita (ruderi) - complesso, Ossuccio (CO) – Architetture – Lombardia Beni Culturali. URL consultad in data 15 aprile 2021.
  7. ↑ Heinrich Gelzer, Georgii Cyprii Descriptio orbis romani (in el), Lipsia, B.G. Teubneri, 1890.
  8. ↑ Pietro Pensa, 1.4 - La difesa di Francione, in La presenza dei Longobardi e dei Franchi sul Lario, Rivista di Lecco, nº 1, Lecco, 1979.
  9. ↑ F. Ballarini, Compendio delle cronache della città di Como, Como, 1619.
  10. ↑ Ugo Monneret de Villard, "L'Isola Comacina. Ricerche storiche ed archeologiche", in RAC, (1914), pp. 70-71.
  11. ↑ Magni Felicis Ennodi, Epistula ad Faustum, in Larius, tomo 1, 1959.
  12. ↑ Monneret de Villard, op. cit.
  13. ↑ G. P. Bognetti, op. cit., in ASL 1-4, 1944.
  14. ↑ Fabio Romanoni, La guerra d’acqua dolce. Navi e conflitti medievali nell’Italia settentrionale (in it), Bologna, CLUEB, 2023. 978-88-31365-53-6
  15. ↑ Carminati e Mariani
  16. ↑ Belloni et al., p. 19.
  17. ↑ Pietro Pensa, L'anomalia diocesana tra Lario e Ceresio nel quadro delle vicende storiche dei corridoi menaggino ed intelvese, in Communitas, 1983, pag. 10.
  18. ↑ M. Gianoncelli, Como ed il suo territorio, Società storica comense, 1982.
  19. ↑ Pietro Pensa, Noi gente del Lario, Cairoli ed., Como, 1982, pag 605.
  20. ↑ 20,0 20,1 20,2 Bartolini, p. 165.
  21. ↑ it-IT Mappe di comunità - Isola Comacina. URL consultad in data 2024-01-11.
  22. ↑ 22,0 22,1 22,2 22,3 Trabella, cap. 17.
  23. ↑ Case per artisti - complesso, Sentiero degli artisti - Ossuccio (CO) – Architetture – Lombardia Beni Culturali. URL consultad in data 15 aprile 2021.

Bibliografia

Modifega
  • G. P. Bognetti, Non l'Isola Comacina ma l'isola di Lerin, in ASL 1-4, 1944, articolo formato pdf.
  • L. M. Belloni, L'Isola Comacina dal VI al IX secolo, in ASL, 1963.
  • L. M. Belloni, L'isola Comacina e la sua antica pieve, ed. Cairoli, Como, 1966.
  • L. M. Belloni, Le fortificazioni della Comacina quale moderno caposaldo organizzato a centro di fuoco con funzione di posto di scoglio, ed. Cairoli, Como, 1971.
  • M. Gianoncelli, Note storiche sull'Isola Comacina, in ASL, 1973.
  • Luigi Mario Belloni, Alberto Longatti (a cura di), Castelli basiliche e ville - Tesori architettonici lariani nel tempo, Como - Lecco, La Provincia S.p.A. Editoriale [1991].
  • AA.VV., Una chiesa tra lago e montagne - A Giovanni Paolo II, Como-Lecco, La Provincia S.p.A. Editoriale [1996].
  • Touring Club Italiano (a cura di), Guida d'Italia - Lombardia (esclusa Milano), Milano, Touring Editore [1999]. 88-365-1325-5
  • Franco Bartolini, I segreti del Lago di Como e del suo territorio, Cermenate, New Press Edizioni [2006], 2016.
  • Fabio Carminati e Andrea Mariani, Isola Comacina e Isola Comense: una storica con-fusione di identità, in Nuova rivista storica, C, nº 1, 2016, DOI:10.1400/239817, ISSN 2036-3206. URL consultato il 7 luglio 2018.
  • Francesca Trabella, 50 Ville del Lago di Como, Lipomo, Dominioni Editore [2020]. 978-88-87867-38-1

Vos correlade

Modifega

ligam de foeura

Modifega
Utegnüü da "https://lmo.wikipedia.org/w/index.php?title=Isola_Comacina&oldid=1272673"