Licee di scenze umane
|
Quest articol chì l'è scrivud in lombard, con la Noeuva Ortografia Lombarda |
El licee di scenze umane a l'è vuna di scoeule segondarie de segond grad che se po andà dopo havé fad i scoeule medie, che 'l gh'ha 'me obietiv de dà 'na formazzion assee umanistega, con materie compagne de la pedagogia, de la psicologia, de l'antropologia e de la filosofia, oltra a dirit, economia e i lengov, ingles e latin in l'opzzion de bas e ingles e 'na lengua foresta in l'opzzion economegh-social.
In principi el se ciamava "scoeula normal" e la gh'haveva 'me obietiv el formà di docent di scoeule elementar, e se entrava dopo de quelle, a quindes o sedes agn. Poeu, con la reforma Gentile, a l'è partida in d'una scoeula media e vuna superior e l'è ciamad "Istitut Magistral", pensad per formà i noeuv docent per la scoeula elementar de cinch agn. Con la reforma Bottai del 1940, comunque, el perd la scoeula media. In tra el 1952 e 'l 1998 a l'è normad de la lesg fada de l'Antonio Segni e 'l diploma el permet de andà a insegnà o de laureàss, inscì de podé deventà dirigent. El programa el gh'haveva dent italian, latin, lengua foresta, storia, matematega e fisega, cant, filosofia e pedagogia, psicologia, scenze naturai, dissegn, esercitazzion didateghe, educazzion fisega e religion o atività alternativa.
In del 1998 descomparissen i Istitut Magistrai, che inn sostitutid de 'n poo de licee sperimentai, fina a la reforma Gelmini che, in del 2010, la istituiss formalment el licee di scenze umane, incentrad propi in sui scenze umane, e con la pedadogia destacada de la filosofia.