Lorentegg
El Lorentegg (Lorenteggio) l'è on quarter de Milan, svilupaa longh i strad via Lorenteggio e via Giambellino.
El se troeuva a sud-òvest del centro, in del Municipi 6. I dò strad, parallel e longh pussee de 2 chilòmetri, colleghen Milan e la città de Còrsigh.
Socialment l'è puttòst variegaa, perchè a gh'è sia cà popolar che zònn residenziai.
Stòria
ModifegaEl Lorentegg l'è staa on comun per on bell poo de temp, a partì de l'ann 1000 circa. Vist che l'era molto foeura di mur de Milan, el se trovava in de la campagna e 'l gh'eva vari cassinn, trai quai regòrdom Cassina Còrba, Cassina Lorentegg, la Cassinazza, la Cà di Biss e Cassina Travaja.
A partì del Settcent ona part de Lorentegg l'è stada dada ai Còrp Sant. In del 1841 el comun de Lorentegg l'è vegnuu frazion de Còrsigh, menter el rest del paes l'è andaa dree al destin di Còrp Sant, che in del 1873 hinn diventaa part de Milan. La part restada a Còrsigh l'è passada a Milan in del 1923.
Quand che l'era on comun indipedent, Lorentegg el gh'eva tre frazion (Cassina Travaja, Molinett e Gesoeu de Robarell) e 'l faseva part de la Piev de Cesan Boscon.
Come quarter de Milan, el Lorentegg l'ha perduu la soa economia agricola (al dì d'incoeu domà la Cassina Còrba la fonziòna anmò), per diventà prima ona zòna industrial e poeu on sitt indove ghe andaven a viv i emigrant del sud de l'Italia. Per tanto temp i quarter de Lorentegg e del Giambellin hinn staa consideraa di loeugh on poo pericolos, sede de attività criminai (come 'l testimònia la canzon del Giorgio Gaber La Ballata del Cerutti).
Lorentegg e 'l Giambellin hinn staa famos per la presenza o la frequentazion de Giorgio Gaber, Adriano Celentano, Bobby Solo, Enrico Mentana, Renato Vallanzasca.
A Lorentegg a gh'è la stazion de Milan San Cristòfen, longh la ferrovia Milan-Mortara.
Bibliografia
Modifega- Gabriele Pagani, L'antico comune di Lorenteggio, New Press edizion, Milan, 2012.