Luigi Vacchini
|
Quest articol chì l'è scrivud in lombard, con la Noeuva Ortografia Lombarda |
El Luigi Vacchini (Lod Vegg, 19 de sgiugn 1883 - Ebensee, 1 de avril 1944[1]) a l'è stad un ghisa e partesan italian.[2]
Biografia Modifega
Nassud a Lod Vegg del Francesco e de la Ernesta Veneroni, el vegn su in d'un ambient propi socialista e a 22 agn ghe va dent ai Ghisa de Milan.[2]
El se marida con la Ester Maria Re, che ghe darà du fioeui: el Francesco e l'Angela.[1]
Del 1926 el ved un so collega, el Dante Aristide Rossi, copad di camise negre, che inn arestade ma poeu assolte, roba che 'l mena a stà lontan a nivell ideologegh del fassism, anca se in la soa vita el se iscrivarà mai a un partid.[2]
El so lavorà in la Resistenza Modifega
Dopo de l'armistizzi de Cassabile el scerniss de sgiontàss a la Resistenza italiana: per via de la soa età el se met a catà daner per finanzià i formazzion partesane e 'l fa con costanza, tant de fà vegnì di sospet ai fassista, inscì el prim de marz del 1944 a l'è arestad de la Legion Muti, grazzia a la delazzion de l'Amedeo Brochieri, sansepolcrista, ardit de guerra e legionari fiuman.[2]
Torturad, a l'è poeu consegnad ai todisch che 'l menen prima al camp de Fossel e poeu, una setimana dopo che l'hann ciapad, a Mauthausen, cont un treno partid de Fiorenza, indova che el riva el 11 de marz: dopo la quarantena el so grup el sarà menad al camp satellit de Ebensee. [2]
El moeur el prim de avril del 1944 quand che l'è metud a lavorà a scavà la preja, cont el so corp che 'l sarà minga bon de resister al gran sforz.[2]
Regord Modifega
L'è mitud sota in del camp midem, indova che incoeu a gh'è un monument che 'l regorda tucc i deportad.[2] In piazza Ceser Becaria gh'è una preja d'inciamp dedicada a lu, desgià che 'l lavorava lilinscì[1], mituda el 25 de sginer 2019 a la presenza de la vize-sindega Anna Scavuzzo, de la senatora a vita Liliana Segre, de l'artista todesch Gunter Demnig e del capo di ghisa Marco Ciacci.[3]
Riferiment Modifega
Alter proget Modifega
Wikimedia Commons el gh'ha dent imagin o alter archivi su Luigi Vacchini
