Luis Bolza
|
«Se 'l mazzee fii roba giusta, se 'l salvee fii roba santa»
|
(El Cattani in sul Bolza, descovert in di cinch giornad)
|
El Luis Bolza (Lovee, 1786 - Lovee, 9 de fevree 1874) a l'è staa 'n fonzionari de polizia austriegh che l'ha lavoraa in del Regn Lombard-Veneto.
Biografia Modifega
Nassuu in d'ona familia comital del comasch rivada de la Spagna in del '500 de che l'era esponent anca el maester d'italian del Cecco Beppe Giovan Battista Bolza, in del 1810 el va dent in la polizia del Regn d'Italia napoleonegh indova che 'l se occupa di indagin politegh, el se infiltra per esempi in la Massoneria e in di ges per menà via quej che gh'even di materiai religios proibii. Con la Restaverazion l'è no assunt direttament in la ministrazion lombardo-veneta ma el riess a rivàgh poeu grazia a 'na raccomandazion e 'l deventa vun di pussee important fonzionari de polizia de l'Austria in Lombardia, per esempi el partecipa al process del Federico Confalonieri, che ha menaa a la fortezza del Spielberg. Cognossuu per la soa dura repression del penser diferent, in di cinch giornad de Milan l'è descovert e graziaa del Carlo Cattani. Fermaa i rivolt l'è inquisitor del Enrico Tazzoli, menter i sò fioeui s'hinn distint in di guerr de independenza italiann.
L'ha scrivuu poeu 'n autobiografia che la cunta su in dettaj el fonzionament del sistema de polizia de l'Austria in Lombardia, Misteri della polizia austriaca in Italia narrati dal conte L.B., ex commissario superiore di polizia, publegaa a Milan in del 1863.