Mari Emmanuel
|
Quest articol chì l'è scrivud in lombard, con la Noeuva Ortografia Lombarda |
El Mari Emmanuel (nassud Robert Shlimon; Baghdad, 19 de luj 1970) a l'è un vescov cristian assir, ordinad del 2011 in l'Antiga Gesa d'Orient e che del 2015 l'ha fad su una soa gesa a Sydney, ciamada del Gesù Bon Pastor, che ghe stà adree al rit siriach oriental.
| Sess o gener | mas'c  |
|---|---|
| Nom de nassiment | Robert Shlimon |
| Nòm | Mari |
| Cognom | Emmanuel |
| Data de nassiment | 18 Lui 1970 |
| Sit de nassiment | Haditha |
| Lengua mader | Idioma asirio |
| Lengov parlade o scrivude | Lengua araba, ingles australian |
| Ocupazzion | Prevet |
| Carega | Vescov |
| Scoeula frequentada | Fairfield High School |
| Prefiss onorifegh | Mor |
| Residenza | Sydney |
| Posto de laoro | Gesa de Gesù Bon Pastor |
| Religion | Cristianesim |
| Consacrad de | Yacob Hormuz-Paulose |
| Member de | Antiga Gesa d'Orient, Gesa de Gesù Bon Pastor |
| Event important | cortellament de la Gesa de Wakeley |
Biografia
ModifegaNassud in Iraq de una familia cristiana osservanta, el fa san-Martin in Australia in di prim agn '80 e 'l lavora 'me diretor de banca, per poeu vesser ordenad diacon vers la fin di agn '90 e pret del 2009. Del 2011 l'è ordenad vescov sufragani de la diocesi de Australia e Noeuva Zelanda de l'Antiga Gesa d'Orient e del 2013 el patriarca Addai II Giwargis ghe dà la conferma patriarcal, a domandàgh però di cambi dotrinai, che inn fad no, l'è donca sospendud del sgiugn 2014 e l'è restad inscì foeura che per un acord curt a dicember.
Del 2015 l'ha fad su la soa gesa, che l'è in d'un status canonegh minga ciar dent de l'Antiga Gesa d'Orient de l'Australia. Deventad famos in sui social grazzia ai so descor, gh'è stada un poo de polemica al temp de la pandemia de COVID-19, indova che l'haveva critegad la vacina, e l'ha sostegnud anca alter posizzion complotiste, per esempi in su l'elezzion del Joe Biden 'me president di Stat Unid.
El 15 de avril del 2024 a l'è cortellad in la soa gesa, poch dì dopo che un gran cortellament a Sydney l'haveva lassad ses mort in d'un center comercial: a l'è menad in ospedal e 'l perd l'oeugg drit.