Massimo Tartaglia

Chest artícol a l'è scricc in Lumbàrt, ortograféa orientàl unificàda.

Ol Massimo Tartaglia l’è nasìt in del 1967, l’istà de cà a Cesan Boscon e l’ laùra ‘n d’öna dìta de ‘nformàdega ‘nsèma al pàder e a ün óter sòcio.

La sira del 13 de Dezèmber del 2009, dé de Sànta Loséa a la fì de ü comìsio tegnìt dal Silvio Berluscù a Milà, l’à tiràt a Presidènt del Consìgl öna statüèta de metàl a fùrma del dòm de Milà, öna spéce de souvenìr, e l’là ciapàt söl müs.

Ol Massimo Tartaglia l’ gh’à isé spacàt ol nas, teàt ol làer e rompìt dù décc al Silvio Berluscù, che l’è stai söbet menàt a l’ospedàl, menimà ol Massimo Tartaglia l’è stài söbet ciapàt da i polisiòcc e da i òmegn de la scòrta del Presidènt del Consìgl che i l’ là isé salvàt da la zèt che l’éra tacàt a picàl e la res-ciàa de copàl.

L’è stacc arestàt e 'nterogàt ‘n questüra dal procuradùr de l’antiterorìsm Armando Spataro, l’è saltàt fò che l’ gh’à mia precedèncc, fò che la patènt ritiràda, l’è mia teseràt a ü partìt, ach se la sò famèa l’è de sinistra e la óta Pd, e l’è ‘mpó malàt de nèrf e per chèsto l’è ‘n cüra da dés agn.

L’è stacc incriminàt per lesiù plüriagraàde a ün üficàl püblico e premeditàde.

Quando l’è stài fermàt l’à dicc “Só mia stai mé, mé só nisù” e i gh’à troàt ‘n sacòcia, öna lama de 20 ghèi facia de plexiglass, ün óter souermèbel de quars, ü crucifése de gès e öna bombolèta de spray al peperunsì.

Ol 14 de Dezèmber in giurnàda l’è stacc interogàt amò turna e l’à dicc che ol sò l’è stacc ü gèst pulìtech, dezà che lü, ol Berluscù, ‘l pöl pròpe mia èdel.

Sèmper ol 14 de Dezèmber in seràda l’à mandàt öna lètera al Berluscù, per iscüsàs.

L’è ü volontàre del WWF.

Ol 20 de zenér del 2010 l’è egnìt fò de San Vitùr e l’è stai portàt a l’Ospedàl de San Carl. Ol Gip Cristina di Censo l’à dacc ol permès de portàl in ospedàl, dezà che ‘n galéra l’è pegiuràt de salüte e gh’éra ol réscc che l’ se fès del mal desperlü.

• Ol 24 de Zögn ol Masimo Tartaglia l'è asòlt co la giustificasiù che l'éra mia bù de ragiunà 'n del momènt che l'à tiràt la statüìna söl müs al Berluscù.