Lombard Occidental

Quel articul chì l'è scrivüü in Lumbard, cun l'urtugrafia insübrica ünificada.

Matee Modifega

La Parola del nost Signur ciapada inscí cuma l'è de'l Növ Testament e vultada adess in del nost parlà Insübregh del didincö.

Capitel Ses Modifega

1 Ociu a fà del ben dumà inscí de fass amirà di olter, fa minga inscí, sedenò spèces no de vess amirà del Signur che l'è in Cel. 2 Quand che ti te ghe deet un quejcoss a un puarèt, fà no cumpagn di ipòcrita che ciapen sü la trumbeta e 'l disen a tücc: en parlen in di sinagogh e in di cantun di straa, inscí de fass ludaa de tücc. Mi a ve disi, cara i mee fiö: vün che 'l fa inscí 'l s'è giamò daa na recumpensa deperlü! 3 Se ti te ghe deet una man a un quejvün, fa inscí che la man a manscina la vegna no a saè quel che la fa quela a drissa; el duaría saèl nissün. El Signur, che 'l ved e 'l sent tüsscoss anca quel che l'è faa de scundun, 'l te la daraa Lü na bela recumpensa.

5 "Stee minga lí a pregà a la manera di ipòcrita! Lur hinn semper lí a pregà in di sinagogh e in di cantun di straa, bel in vista inscí che la gent i ved. Mi a ve disi: vün che 'l fa inscí 'l s'è giamò daa na recumpensa deperlü! 6. Quand che te seet dree a pregà va in la tua camara, sara sü l'üss dedree de ti, e prega 'l to Pader. El Signur, che 'l ved e 'l sent tüsscoss anca quel che l'è faa de scundun, 'l te la daraa Lü na bela recumpensa. 7 E segütee minga a dì l'istessa preghera mila völt a fira, cumpagn di quij che 'l Signur 'l cugnussen no. Lur pensen che cunt tücc chi ciciarád chí hinn dree a meretass un quejcoss del Signur. 8 Ma violter fee minga inscí, perchè 'l Signur el sa quel che vün el gh'ha besogn giamò inanz che vün ghe'l ciama. 9 Alura violter gh'ii de pregà a chela manera chi: 'Pader nost che te seet in Cel che 'l sia faa sant el To nom, 10 che'l vegna 'l To regn, che 'l sia faa 'l To vurè, cumè in Cel inscí anch in sü la tera 11 Dànn incö el nost pan de tücc i dí, 12 e perdunum i nost pecaa, inscí cuma anca nüm ghe perdunum a quij che n'hann faa un tort. 13 Menun minga in de la brüsa de pecà, ma liberun del maa, e che 'l sia inscí. Perchè Tua l'è la Gloria, la Forza e l'Unur adess e per semper! 14 El vost Pader in Cel 'l ve perdunaraa sí se anca violter perdunaii quij che v'hann faa un tort. 15 Però se violter i perdunarii no, alura anca 'l Signur 'l ve perdunaraa no.

16 "Quand che sii dree a degiünà, fee minga 'l müs lungh inscí 'ma fann i ipòcrita! Lur vann in gir de chi e de la cunt una brüta cera inscí che 'l vegnan tücc a saè che lur hinn dree a degiünà. Mi a ve disi: ün che 'l fa inscí 'l s'è giamò daa na recumpensa deperlü! 17 Quand che sii dree a degiüna, crüzzieves del vost parè, de la vosta cera, 18 inscí che nissün el vegna a saè, föra che 'l Signur, del vost patì. El Signur, che 'l ved e 'l sent tüsscoss, anca quel che l'è faa de scundun, 'l te la daraa Lü na bela recumpensa. 19 Crüzzieves minga trop di danee e di giuiej! Violter el saii ben che i danee e giuiej vegnen majaa föra ben a la svelta di tarm e de la runsgen, upür vegnen rubaa di lader! 20 Crüzzieves di quel che gh'avarii in Cel, già che i rob in Cel vegnen no rubaa e vann no a maa. 21 In fin de la fera, in vost cör el saraa semper indua che gh'ii i vost giuiej." 22 L'ögg el te da no la Lüs. Quand che i to ögg fann vegnì dent la Lüs, alura te vivareet int la Lüs. 23 Se al cuntrari i to ögg se saren sü, alra te vivareet int el fusch. Ma se la Lüs in del to cör l'è smursada, pensa un puu ti che scür che 'l saraa 'l to mund. 24 Nissün 'l po dà a trà a düü patrun a l'istess temp. Vün che'l vör servì vün di patrun de bun, el se po no crüzzià di desideri de l'olter. Se vün el se crüzzia de bun de vün, alura 'l gh'ha de desmentegà l'olter. Anca violter pudii minga viv e per el Signur e per i danee. 25 Per chela resun chi mi a ve disi: perocüpeves minga del disnà, del trincà, del drumì e di vest. La vita l'è ben püssee de dumà disnà e trincà, e l'om l'è ben püssee impurtant de la sua vesta.

26 Vardeves un puu ij üsej! Sumnen negot, caten sü negot, meten negot in di er, però in d'una quej manera 'l Signur 'l ghe dà de viv. Credii no de vess un cicininn püssee impurtant di üsej in di ögg del Signur? Gh'èl un vergün intra violter che l'è bun de slungàss la vita anca dumà d'un dí? 28 E alura, gent, preocüpàss de fà di vest? Vardéves un puu i müghèt che fiurissen in di praa! Lauren no e spulen no! 29 Mi a ve disi, gnanca 'l re Salumun int un dí de festa l'eva inscí bel cuma chi müghèt chi!

30 Se 'l Signur el lassa perfinn l'erba de chel praa chi cress bela e verda, e vardee ben che chel'erba chi l'è chinscí incö ma la 'gnaraa giamò brüsada duman, pensarii minga che 'l Signur el se desmentegaraa de violter? Fideves de bun del Signur! 31 Alura, cara la mia gent, s'cepeves no 'l cuu cunt dumand cumpagn de 'gh'avarèm assee de disnà? E 'sa l'è che l'è che trincarèm? Sa l'è che gh'em de metes sü?' 32 Chi rob chi ghe interessen dumà a quij che cugnussen no 'l Signur. El Signur che l'è in Cel el sa ben Lü de cusalè che gh'ii besogn. 33 Procüpeves alura de la Parola del Signur, e fee inscí 'ma 'l ve dis Lü! Pö, 'l ghe pensaraa Lü a dav tüt el rest. 34 Alura, cara i mee fiö, procüpeves minga trop del duman - el duman el se metaraa a post lü deperlü! La crus che gh'ii in gropa incö l'è giamò assee, ve 'l disi mi!

Navigaziun Modifega