Matee Capitel Trii
|
|
Quel articul chì l'è scrivüü in Lumbard, cun l'urtugrafia insübrica ünificada. |
Matee
ModifegaLa Parola del nost Signur ciapada inscí cuma l'è de'l Növ Testament e vultada adess in del nost parlà Insübregh del didincö.
Capitel Trii
Modifega1 In quij dí lí gh'eva un tal Giuann Batísta dree a predegà in del desert de la Giüdeja, 2 e'l disea: "Pentives! Che 'l regn del Signur l'è dree a 'gnì!" 3 Perchè chess chí l'è propi Lü, l'è propi quel che'l prufeta Jesaja 'l n'ha nünziaa: "ghe saraa na vus che la ciamaraa in del desert e la disaraa: preparee la straa al Signur![1]" 4 Lü, 'l Giuann, 'l gh'eva indoss na pelandrana de pej de camèl e na zenta de cüram intorn a la vita; 'l so disnà l'eva faa sü de lüsèrt e mel salavadegh. 5 Tücc quij de Gerüsalèm, e de la Giüdeja intrega, eren dree a 'gnì de Lü a fass batezzà e a cunfessà i so pecaa.
7 Ma quand che 'l Giuann l'ha vedüü na mota de Farisee e de Sadüzzee vegnì a fass batezzà de lü, e'l gh'ha dii a lur, e 'l gh'ha faa: "Na brüta razza sii violter, di brüt serp sii, ve 'l disi mi!! Chilè che 'l v'ha dii de vegh pagüra de la püniziun che l'è dree a 'gnì?? 8 Purteem chí almanch de la bela früta fresca inscí de fà un puu de penitenza! 9 E stee minga lí a pensà deparvü: 'Bè in finn de la fera nüjolter sem anca nüm fiö de l'Abram', perchè 'l Signur, vardee ben, violter baloss, perchè 'l Signur l'è bun de fà un fiö de l'Abram perfinn cunt che la preja chí che gh'huu suta i pee!!! 10 Vardee che 'dess la 'segür' l'è bela prunta a tajà a la radis tücc ij arbur che fann no cünt de fà bun früt!!! Ociu, nè, che vee a finì in del fögh!!!
11 Mi a sunt chí che ve batezzi cunt l'agua inscí de fav pentì; ma quel che l'è dree a 'gni despö de mi, e che l'è ben püssee fort de mi, e mi sunt gnanca dign de netàgh i söl di scarp, chel lí, 'l ve batezzaraa cunt el Spiret Sant e cunt el Fögh! 12 Lü 'l gh'avaraa 'l restrèl in de la man e cunt quel 'l ciaparaa sü tüt 'l furment, ma la crüsca Lü la traraa in del Fögh etern!!"
13 Alura un bel dí, de la Galileja, 'l vegn el Gesü a fass batezzaa del Giuann in del Giurdàn. 14 Ma 'l Giuann 'l se tira 'ndree e 'l ghe fà: "Sunt mi che gh'huu de 'gnì a fam batezzaa de Ti, minga Ti de mi!!!!" 15 E alura 'l Gesü 'l ghe respund: "Ti preocüpes no e batezzum, Giuann, inscí che fem tüt quel che gh'em de fà" E alura 'l Giuann l'ha dervii pü boca e l'ha batezzaa. 16 E 'pena che'l Crist l'è staa batezzaa e l'è gnüü föra de l'agua, sentii chí 'sa l'è che l'è sücedüü: el ciel 'l s'è dervii e 'l Spiret Sant el gh'è crudaa sgiò in sül cuu in sül fà d'un piviun e 'l s'è sentüda na gran vus che l'ha dii: "Chess chi l'è me amaa Bagaj e mi a ghe vöri un gran ben!"
- ↑ Jesaja 40,3