Barr

Quest articol chì l'è scrivuu in lombard, grafia milanesa.

El Barr (Monte Barro) l'è ona montagna di Prealp Luganes (in del Triangol Larian) che l'è alta 922 meter.
L'è voeuna di primm Prealp che se incontra in la strada che de Milan la riva a Lecch.
El mont a l'è in del territori di comun de Galbiaa, Valmadrera, Pescaa e Malgraa. El divid el lagh de Annon de quei de Garlaa e de Comm.

El Barr vist del Magnoeuden: denanz a gh'è 'l Lagh de Comm, de dree inveci quell de Annon, menter pussee in fond se ved quell de Pusian.

	«Quand el Barr el gh'ha el cappell, corr a cà e toeu sù el mantell»
	(Proverbi tipigh di montagn lombard)

El nomm

Se cred che 'l termen barr el sia de origin celtega, e 'l voeura dì quaicoss compagn de "montagna". La parolla la gh'ha di ligamm anca cont i lengov celtegh del dì d'incoeu: per esempi, barr in irlandes el voeur dì "scima", e l'è anmò doperaa per ciamà di montagn (tant 'me 'l Barr Trí gCom, che 'l voeur dì pu o manch "scima di trii boeugg"). Inoltra l'è ligaa a olter montagn de la Lombardia e de la Svizzera, compagn del Barr in Canton Tesin (it. Monte Bar) e 'l Berr in Valtolina (it. Pizzo Berro).