Pass innocent
|
Quest articol chì l'è scrivud in lombard, con la Noeuva Ortografia Lombarda |
Per pass innocent se intend, in del dirit del mar, la possibilità per un vassell de passà per i aque territoriai de un Stat sovran con di limitazzion. In bas a la Convenzion di Nazzion Unide in sul Dirit del Mar, un pass a l'è innocent se el fa minga de dagn a la pas, a l'orden e a la sigurezza del Stat coster, 'me per esempi fà esercitazzion cont i armi, andà a pesca, bordegà, menascià la sovranità del Stat o fà andà in cel o aterrà un sgolatasc.
Nassuda 'me tradizzion in del secol quell de desnoeuv, cont el rivà di gran spostament cont i nav, l'è deventada lesg in del 1982 con la convenzion ONU a tema. L'è minga de sconfonder con la libertà de navegà: se cont el pass innocent se recognoss de vesser in di aque de un Stat e se aceta di limitazzion, menter con la libertà de navegà se aferma de vesser in aque internazzionai, cont el dirit de fà tusscoss quell che l'è permess lilinscì.