Pietro Cociancich
|
Quest articol chì l'è scrivud in lombard, con la Noeuva Ortografia Lombarda |
El Pietro Cociancich (italianizad in Pietro Canziani; Umag, 7 de marz 1884 - Castelfranch, 17 de setember 1944) a l'è stad un anarchegh italian, che l'ha combatud insema ai republegan in la guerra civil spagneoula e l'ha tolt part anca a la lota contra el fassism italian.[1]
Biografia
ModifegaEl Cociancich el nass a Umag, cità de l'Istria che al temp la partegniva a l'Imperi d'Austria, fioeul de l'Antonio e de la Maria Vouk.[1] Legnamer de profession, el se svesina de sgiovin al moviment anarchegh e ghe va dent ai moviment triestin, ben sorveliad di polee asburgegh.[1] El va soldad in la Gran Guerra, indova che l'è mariner de la Marina austriega.[2]
Quand che la soa banda la passa al Regn d'Italia el se troeuva a lotà contra i fassista, per esempi cont el difender la Cambra del Lavorà de Triest: i squadrasce negher ghe brusarànn la cà per quella reson chi.[1]
In del setember del 1925 ghe troeuven un toch de granada in cà e 'l denonzien[3], e l'ann adree a l'è arestad a Oneglia, intant che 'l provava a lassà el Paes illegalment.[1] Del 1928 a l'è arestad a Fium, indova che l'era dree a cercà un lavorà o a scapà, perchè el gh'haveva di daner fals.[1] Semper l'istess ann la Milizzia Volontaria per la Sigurezza Nazzional de Turin el definiss 'me l'anarchegh pussee ativ de Triest.[1]
Del 1930 el lassa l'Italia per andà a lavorà in Franza, ma el lassa a Triest la mier e 'l fioeul.[1] Lilinscì el taca la lota armada contra i struture fassiste: el 14 de sginer del 1932, dopo vessés sigurad che gh'era dent nissun, el fà soltà per ari insema al Dante Fornasari la Cà di Italian a Aubagne, indova che gh'haveva sed la sociazzion di ex-combatent, doperada del regim per spionà in sui antifassista italian che inn andad foeura del Paes.[1] La bomba la s'ciopa trop prest, e 'l Fornasari l'è ciapad subet di polee, menter el Cociancich el sarà menad via poch inanz.[4]
Processad in la cort de Aix-en-Provence, indova che 'l se ciapa tuta la responsabilità moral e politega de quell che gh'è capitad, e 'l condanen a cinch agn de preson. [1] Al so process, che 'l deventarà squasi un process al fassism, testimoniarann el Giobbe Giopp, l'Emilio Lussu, el Mario Angeloni e 'l Luigi Campolonghi.[4]
Una voeulta che i ha scuntad, el 17 de sgiugn 1937 el va a Barcelona e 'l se sgionta ai forze libertarie che combateven contra el Francisco Franco: grazzia a la soa esperienza de mariner el meten in la colona Tierra y Libertad ma, cont el perder di republegan, el torna indree in Franza, indova che l'è tegnud in d'un camp de detenzion per quei che eren scapad de la guerra in Spagna,[1] indova che 'l ris'ciava l'estradizzion in Italia.[3]
El scapa poeu del camp per andà in Belgi, indova che del november 1940 a l'è arestad e mitud in preson con la cusa de havégh havud un passaport fals. [1][2] Quand che i nazista ciapen el Belgi la Gestapo el manda indree in Italia, e 'l governo el manda al confin a Ventotene: ghe restarà poch, desgià che prest el menen in la preson romana de Regina Coeli, cusad de havé tolt part a l'atentat al Vitori Emanuell III del 1928 in piazza Giuli Ceser a Milan, che l'haveva lassad 20 mort.[1]
Dopo che del 1943 l'hann interogad in sui so raport cont el Giobbe Giopp e l'Emilio Lussu el menen in la preson modenesa de Castelfranch, indova che 'l cognossarà el Claudio Pavone 'l morarà vitima de 'n bombardament.[1][2][3]