Porta Venezia
Porta Venezia, cognossuda anca 'me Porta Renza (Porta Venezia in italian, antigament Porta Orientale) l'è vuna di ses port milanes pussee important.
La se troeuva in sui bastion, in su la strada che la menava in Brianza, a nord-est del centro. A nord-ovest a gh'è Porta Noeuva, a sud inveci Porta Vittoria.
La ciappa el sò nomm de la città de Venezia. El vegg nomm milanes (Porta Renza) el vegn inveci de la veggia porta di mur roman ciamada Porta Argentea, perchè l'andava invers el paes de Argentiacum (incoeu Crescenzagh).
L'è stada fada su in del XVI secol di Spagnoeu. Al de là de la Porta el se trovava el Lazzerett de Milan, indè che staven i malaa de pest. Minga lontan de lì, ghe passava el Redefoss.
In tra el Settcent e 'l Vottcent hinn scominciaa i progett per fàlla vegnì pussee moderna: inscì l'è stada trada giò la porta e hinn staa conservaa domà i duu casei del dazzi, che resisten anmò incoeu.
L'è cognossuda in de la litteradura italiana per vess la porta de indè che 'l passa el Renzo Tramaglino quand che 'l va dent a Milan in del romanz I promessi sposi del Manzon.
Alter progett
Modifega
Wikimedia Commons el gh'ha dent imagin o alter archivi su Porta Venezia
