Prima Curinz Capitel Des

Quel articul chì l'è scrivüü in Lumbard, cun l'urtugrafia insübrica ünificada.

Prima Curinz

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Des

¹Già che vöri no che siuv ignurant, fradèj, che tücc i noster pader eren suta la niula, e tücc hinn vegnüü travèrs el mar, ²e tücc hinn batezaa per Musè in de la niula e in del mar, ³e tücc hann mangiaa el medemm mangià spiritüal, ⁴e tücc hann bevüü el medemm bév spiritüal; già che hann bevüü de la prèja spiritüala che 'l i è vegnüü dedree, e la prèja l'era 'l Crist.
⁵Ma Diu l'ha ciapaa piasè de tant de lur, già che hinn staa sbatüü giò in del desért. ⁶E chèstcoss hinn devegnüü esempi per nümm, perchè sium minga quij che desideren robb malign, cuma lur hann desideraa. ⁷Né devegnii iduladúr cuma quij de lur, cuma l'è scritt: «La gént la s'è setada giò per mangià e bév, e s'hinn alzaa per giügà». ⁸Né gh'avarìum de furnegà, cuma quij de lur hann furnegaa e in d'un dì hann burlaa giò vinttrii mila. ⁹Né gh'avarìum de tentà 'l Signúr, cuma quij de lur hann tentaa e hinn staa destrütt di serpént. ¹⁰Né barbutee, cuma quij de lur hann barbutaa, e hinn staa destrütt del destrütúr. ¹¹E chèstcoss hinn sücess a lur cuma esempi, e hinn scritt per el noster avertimént, nümm per i quij la fin di sècuj hinn rivaa.
¹²Dunca, lü che 'l pensa che 'l sta in pee, el gh'avarìa de vardà che 'l burla no giò. ¹³Una tentaziún la v'ha ciapaa no se no üman; ma Diu l'è fedél, che 'l permètt no che vialter sii tentaa ultra de chèll che sii capaz, ma 'l farà cun la tentaziún la surtida, perchè puduv supurtàla.
¹⁴Dunca, mè predilètt, scapee via de l'idulatria. ¹⁵Parli cuma a i savi: giüdeghee vialter chèll che disi. ¹⁶El caliz de la benediziún che benedisum, l'è minga la fradelanza del sangh del Crist? El pan che s'cepum, l'è minga la fradelanza del corp del Crist? ¹⁷Perchè nümm, i tant, sèmm vün pan, vün corp, già che nümm tücc ciapum part del vün pan. ¹⁸Vedii l'Israel segund la carna: quij che mangen i sacrifizi hinn minga i cumpagn de l'altar? ¹⁹Dunca, che cossa disi? Che chèll che l'è sacrifegaa a un idul l'è quajcossa, o che un idul l'è quajcossa? ²⁰Ma che i coss che i naziún sacrifeghen, sacrifeghen a demún e no a Diu; e vöri no che vialter devegnuv i cumpagn di demún. ²¹Pudii minga bév el caliz del Signúr e 'l caliz di demún, pudii minga ciapà part de la taula del Signúr e de la taula di demún. ²²O inzigum a gelusia el Signúr? Sèmm püssee fort de Lü?
²³Tüsscoss hinn lecit, ma tüsscoss jüten no; tüsscoss hinn lecit, ma tüsscoss fann no sü. ²⁴Nissün el gh'avarìa de cercà chèll del sé medemm, ma chèll de l'altra persona.
²⁵Mangee ogni cossa che l'è vendüda in del mercaa de carna sénza giüdegà per via de la cuscénza: ²⁶degià che «El mund l'è del Signúr e la sua pienéza». ²⁷Se quajdün de quij che creden no el ve ciama, e vurii andà, mangee ogni cossa che l'è metüda denanz a vialter sénza giüdegà per via de la cuscénza. ²⁸E se quajdün el ve dis: «Chèst l'è sacrifegaa a iduj», mangeel no per via de lü che 'l v'ha infurmaa e de la cuscénza; ²⁹E parli no de la cuscénza de vialter medemm, ma chèla de l'altra persona. Già che perchè la mia libertaa l'è giüdegada de la cuscénza d'un'altra persona? ³⁰Se mì ciapi part cunt el dà de grazi, perchè sun critegaa per chèll che mì duu grazi? ³¹Dunca, se mangii o bevii o fii quajcossa, fii tüsscoss per la gloria de Diu. ³²Che siuv sénza ufèsa se a i Giüdee o a i Grech o a la gésa de Diu, ³³cuma anca mì piasi a tücc in de tüsscoss, cercand minga el prufitt de mì medemm, ma chèll di tant, perchè sien salvaa.

Navigaziun

• ← Indree a Capitel Növ
• Inanz a Capitel Vündes →
• A l'indes