Prossemega
|
Quest articol chì l'è scrivud in lombard, con la Noeuva Ortografia Lombarda |
La prossemega a l'è la dissiplina semiologega che la studia i gest, el comportament, el spazzi e i distanze a l'interna de una comunegazzion, sia verbala sia minga verbala.
Etimologia Modifega
El termin, derivad de l'ingles prox(imity) «prossimitaa», componid con probabilitaa cont el sufiss -emics coma per phonemics «fonemega» e compagn[1], l'è stad introducid e coniad de l'antropologh Edward T. Hall in del 1963 per indicà el studi in di relazzion de vicinanza in de la comunegazzion.
Specifeghe Modifega
L'Hall l'ha osservad che la distanza relazzionala in tra i persone l'è correlada cont la distanza fisega, l'ha definid e mesurad donca quater "zone" interpersonai:
Esempi Modifega
Coma tucc i lenguagg, anca la prossemega la cambia de sit a sit. L'istess Edward T. Hall in del so liber La dimension sconduda l'osserva che la distanza de tegnì, quand che se parla cont oltre persone e travers che se sentom ben, la depend de la propia coltura.
I popol de l’Europa setentrionala e del Nord Amerega inn usad a tegnì distanze pussee grand de quei mediterraner, e schiven el contat fisegh in tra person che cognossen. In Italia se poeuden nodà di diferenze in tra Nord e Sud.
El par che i persone che stan de cà in campagna o in montagna ciapen pussee de spazzi de l'oltra persona, inscambi i persone di citaa scurten i distanze. In discotega i distanze se scurten debon. Notevol rilevanza l'ha ciapad anca la prossemega de l'ascensoeur: per esempi i europer in ascensoeur se meten a cercc cont la s'cena pondada ai pared, inscambi i ameregan se meten in fila cont la faza vers la porta.
La prossemega la gh'ha anca un valor de marcador social: in d'una quai region meridionala de l'India, indova la distanza che i person di diverse caste gh'hann de tegnì in tra de lor l'è stabilida con rigiditaa, quand che i persone de la casta pussee bassa (paria) incontren i bramin, la casta pussee volta, gh'hann de tegnìss a una distanza de 39 meter.
Oltra diferenza l'è quella in tra i sess: i mas'c se troeuven mei a banda de una persona, inscambi i femene de denanz.
El scur el tend a fà scurtà i distanze, inscambi cont la lus i persone tenden a stà pussee delonsg.
Quand che la persona la viola la distanza considerada coma "normala" in d'un cert contest, chi 'l parla el cerca de slontanàss o de dirizer el corp in d'un'oltra direzzion, o el met un "mur" (una borsa, un giornal, un brasc).
Note Modifega
- ↑ Prossemica. in su treccani.it
Bibliografia Modifega
- Edward T. Hall, La dimensione nascosta. Il significato delle distanze tra i soggetti umani, Bompiani, Milan, 1968.
- Franca Pregnolato Rotta Loria, Antropologia e prossemica, Campanotto Editore, Udine, 1998.
- Corrado Veneziano, Didattica della comunicazione verbale e non verbale. Sguardi, prossemica, parole, espressività nella scuola primaria, con una introduzione di Maria Serena Veggetti, Besa, Lecce 2014.
Ligam de foeura Modifega
- Prossemega, in su Enciclopedia Britannega.