Quiee
El Tit Fulvi Giuni Quiee, ciamaa spess domà Quiee (Titus Fulvius Iunius Quietus in Latin; ...-261) l'è staa vun di Macrian, ona famiglia che l'aveva provaa de ciappà el comand de l'Imperi Roman sòta el regn del Gallien.
Biografia
ModifegaEl Quiee l'era fioeu del Macrian Maggior e de ona nobildonna ciamada (forsi) Giunia. L'Historia Augusta la dis che l'era on tribun de l'esercit del Valerian, ma i storigh de adess le pensen minga. L'è diventaa imperador insema al fradell Macrian, dopo che 'l Valerian l'era staa ciappaa di Sasanid (260). Quest perchè l'esercit roman l'era vanzaa molto drent al territori di nemis e perchè el ver imperador (Gallien) l'era lontan, in Occident. L'elezion a imperador de part de l'esercit l'è stada aiutada del sò pà e del prefett del pretori Ballista.
Menter i duu Macrian andaven in Occident a combatt el Gallien, el Quiee e 'l Ballista restaven in Asia. Ma quand che i alter duu hinn staa mazzaa in Tracia, i provinz orientai s'hinn rebellaa e hann reconosuu l'autoritaa del re Odenaa de Palmira, leaa del Gallien. Quiee l'è scappaa in de la citaa de Emesa, indove l'è staa faa foeura de la popolazion, fòrsi per istigazion del Ballista.