Referendum in su l'Independenza de la Catalogna del 2014
El 9 de november del 2014 gh'è staa on Referendum in su l'Independenza de la Catalogna ("9N" in la denominazion corta tipega di Stat de lengua castejana) minga vincolant. El gh'aveva dent du domand: "Voeuret ti che la Catalogna la sia on Stat?" e "Voeuret ti che 'sto Stat chi el sia Independent?".
Han partecipaa al vot 2'305'290 personn, circa el 40% di votant che gh'even driss, ossia tucc i resident in Catalogna de almen 16 agn. L'80,8% l'ha votaa Sì-Sì, el 10,1% l'ha votaa el Sì-No e 'l 4,5% el No.
L'è staa fioeu de 'n accord in tra Artur Mas de la Convergència Democràtica de Catalunya e l'Oriol Junqueras de l'Esquerra Republicana de Catalunya e l'ha permittuu 'na rielezion del Mas a President de la Generalitat de Catalunya del 2012. El 19 de settember el Parlament de Catalogna l'ha approvaa el vot referendari per l'independenza, e 'l governo spagnoeu l'ha daa su recors al Tribunal Costituzional Spagnoeu che l'ha sospenduu el referendum. El Mas l'ha parpognuu el 14 de ottober, per superà el veto costituzional, de fà 'n "process de partecipazion cittadin". La Cort Suprema spagnoeula l'ha sospenduu anca quell, ma 'l governo catalan l'ha faa istess el vot.