Reinhold Messner
|
|
Quel articul chì l'è scrivüü in Lumbard, cun l'urtugrafia insübrica ünificada. |
El Reinhold Andreas Messner (nassüü 'l 17 de setember del 1944 a Barsenun) l'è un alpinista, scritur, pulitegh Südtiroles. El Messner l'è vün di alpinista püssee cugnussüü al mund, ma anca vün di püssee cuntruversiaj: la sua omnipresenza int i Media, i so fras poch diplumategh, e la sua versiun de la mort del so fradèl Günther Messner düranta la scalada del Nanga Parbat in del 1970 che l'è gnüda dübidada di so cumpagn de spediziun hinn i tema pü cuntruversiaj.
La Vida
ModifegaEl Messner l'è chersüü a Villnöß in Südtirol e l'è citadin unurari del cumün. Incö 'l viv a Meran però in di mis de lüj e agust l'è de cà in del so castel Juval (prutegiüü del guerna) a l'entrada de la Val Senales. Pö a Sulden suta l'Ortles el cress i yak e l'ha faa sü un resturant ciamaa Yak und Yeti. Pö 'l tra inanz el müsee ciamaa Messner Mountain Museum. La sua segunda residenza l'è a Münegh.
El Messner l'ha stüdiaa Agrimensüra a l'üniversidaa de Padua ma l'ha mai finii. Per un ann l'ha insegnaa matematega in una scöra media.
El Messner l'è staa spusaa cunt la Ushi Messner (nassüda Demeter) del 1972 finn al 1977. Pö de la relaziun amurusa cunt la Nena Holguin el gh'ha avüü 'nat tusa. El 31 de lüj del 2009 l'ha infin spusaa la sua cumpagna de lunga vita Sabine Stehle. Insema i düü gh'hann trii bagaj.
El Messner l'è staa finn di agn 80 cunt i Verd e l'è staa elegiüü in del parlament de l'EU in del 1999. In del 2004 l'ha pruaa a candedass cunt i verd bavares (l'eva staa cataa a fà 'na reclam a 'na dita de füsij - cunt tant de füsil de casciadur in man che 'l ciapa la mira...) ma gh'hann dii de no.
Spediziun Alipnistegh
ModifegaFinn al 1970 el Messner l'ha faa spediziun in Europa, suratüt in di Dolomit, pö però l'ha tacaa sü a scala i ,unc püssee volt de vot mila meter.
| Ann | Munt (Voltezza del piz in meter) |
|---|---|
| 1970 | Nanga Parbat (8125) |
| 1972 | Manaslu (8163) |
| 1975 | Hidden Peak (Gasherbrum I) (8080) |
| 1978 | Mount Everest (8848), Nanga Parbat (8125) |
| 1979 | K2 (8611) |
| 1980 | Mount Everest (8848) |
| 1981 | Shishapangma (8027) |
| 1982 | Kangchendzönga (8586), Gasherbrum II (8034), Broad Peak (8051) |
| 1983 | Cho Oyu (8188) |
| 1984 | Hidden Peak (Gasherbrum I) (8080), Gasherbrum II (8034) |
| 1985 | Annapurna (8091), Dhaulagiri (8167) |
| 1986 | Makalu (8485), Lhotse (8516) |