Rita Atria
|
|
Chest artícol a l'è scricc in Lumbàrt, ortograféa orientàl unificàda. |
La Rita Atria (Partanna, 4 de setèmber 1974 – Roma, 26 de löi 1992) l’è stàcia öna testimòne de giöstìsia siciliàna, öna testimónia e mia öna pentìda, dezà che l’à mai facc di reàcc.
|
«Prìma de combàt la màfia gh’ét de ardàt in de la tò de cosciènsa e alùra, dòpo che t’ét venzìt la màfia che ta gh’ét dét de té, alùra te pödet combàt la màfia che gh’è tra i tò amìs, la màfia m’s’è nóter e la nòsta manéra sbaiàda de comportàs.
Borsellino, te sét mórt per chèl che te credìet, ma mé, sènsa de té, só mórta.» |
La sò éta Modifega
L’è nasìda 'n d’öna famèa de màfia e a 11 agn l’à perdìt sò pàder Vito, mafiùs de la famèa de Partanna, che l’è stài copàt da Cosa Nostra al tép de la segónda guèra de màfia che l’à portàt i Corleunés a comandà töta la màfia.
Dòpo che gh'è mórt sò pàder, la Rita la se ligàda tat al sò fradèl Nicòla, pò a lü 'n de la màfia, e a la sò cögnàda Piera Aiello e pròpe dal sò fradèl l'è egnìda a saì töcc i afàre di famèe mafiùze de Partanna fina che in del zögn del 1991 'l sò fradèl Nicòla 'l vé copàt pò a lü.
L'è alùra che la sò cögnàda, la Piera Aiello, l'à decidìt de dientà öna colaboratrìce de giöstìsia e la Rita, che la gh'éra adóma 17 agn, la gh'è 'ndàcia dré pò a lé e l'è 'ndàcia di magistràcc per contàga sö chèl che la saìa isé de fà ciapà chi che gh'éra copàt ol pàder e 'l fradèl. Ol prim a regòi i sò confidènse l'è stacc ol Paolo Borsellino che l'è dientàt per lé compàgn d'ü pàder e l'è isé che con chèl che i à contàt sö la Piera Aiello e la Rita Atria i è stacc arestàcc tàce mafiùs e i è stacc indagàcc ach di polìtech compàgn del Vincenzo Culicchia.
Ol 19 de löi del 1992 ol magistràt Paolo Borsellino 'l sàlta 'n ària in de la stràge de via d'Amelio, la Rita l'è disperàda e la gh'à piö nisü, dezà che co la màder, che la ölìa mia che la 'ndès di magistràcc, la se pàrla gnà piö. Isé la se fà ciapà da la biligòrnia e da la depresiù e 'l 26 de löi, apéna öna setimàna dòpo che l'è mórt ol Paolo Borsellino, la se böta zó da la finèstra del apartamét de Roma indo che l'è scundìda e la se cöpa.
Dòpo la sò mórt sò màder la ghe spacherà sö a martelàde töta la tómba e la straserà sö la sò someànsa.