Rivoeulte in Vall Camonega
|
Quest articol chì l'è scrivud in lombard, con la Noeuva Ortografia Lombarda |
I Rivoeulte in Vall Camonega a inn stad di moviment popolar contra del governo del Napoleon che gh'è stad in Vall Camonega, part di pussee ampie rivoeulte anti-franzes in Europa.
Storia
ModifegaLa Vall Camonega a l'era part de la Republega de Venezzia cont el status de "terra separada" fina a l'invasion del Regn d'Italia napoleonegh in del 1797, che l'ha abolid l'autonomia del territori, e l'ha mitud la coscrizzion, volzad i taje e i dazzi e proibid i cerimonie religiose foeura di gese. Quella roba chi la piaseva no ai locai, 'me mostrad in di diari parochiai de l'epoca, che voreven indree el Stat Veneto e i so libertà, e tanta sgent la s'era dada al brigantagg, soratut sgioven che voreven evità la naja.
La rivoeulta del 1809
ModifegaInscì, el 7 de masg 1809 a l'è partida una rivoeulta popolar guidada de du dotor: el Rossi e 'l Favallini. L'insurrezzion la scomincia a Pont de Legn e la riva a la svelta al confin del Tonal, indova che riven poeu i tiroles de la Vall de Sol, sostenud de la logistega austriega e poeu anca di trupe, che menen a 'n volzàss de la violenza, cont anca i valtolin che inn rivad del Pass de l'Abriga a toeunn part, a brusà baite e alter robe, soratut a Pian Camun.
La riva dopo poch la reazzion di franzes, che meten fin a la rivoeulta el 11 de masg, ciapen e menen via i ribei e indova che i giandarma italian se mostren assee cativ, menter quei de la Franza pussee boni. Un quajvun a l'è fusilad in sul post menter i alter a inn processad e assolt tucc, menter i soldad austriegh se retiren in Vall de Non.
I 23 brigancc de Fraine
ModifegaLa resistenza in la zona la va inanz anca dopo, a Fraine, località de Pisogne, in tra el 1809 e 'l 1811 di sgioven haveven sutad a doperà violenza contra i franzes e a viver de robalizzi, soratut contra i pussee sciori, con pussee de 100 crimen fad.
Inn stad ciapad dopo che vun di member l'ha tradid e, dopo de 'n process a Berghem in del 1812, a inn condanad a mort.
In la coltura
Modifega'Sta rivoeulta a l'è regordada insema ai alter brigant de la Vall, compagn del Giorgg Vicari e del Giovann Beatris, in la tradizzional Festa di Brigancc che la gh'è a Pisogne a avost.
In del 2019 a l'è stad publegad un film in su la storia di brigant de Fraine, girad cont el jut de la comunità local e con di scene fade in di rievocazzion storegh a Marengo, in Piemont.
Riferiment
Modifega- La Valcamonica e quel 7 maggio di due secoli fa
- Dalla Rivoluzione Francese al Regno d'Italia
- I Brigancc de Fraine
- Fraine set cinematografico: la storia dei 23 “brigancc” diventa un film
- Storia - Pian Camuno Arqiviad qé: [1]
- Briganti all’epoca di Napoleone nella piccola frazione di Pisogne Archiviad chi: [2]
- Ponte di Legno, serata storica: quando la Valle Camonica si ribellò a Napoleone
Bibliografia
Modifega- Oscar Sanguinetti, Le insorgenze popolari contro-rivoluzionarie in Lombardia nel periodo napoleonico (PDF), in Quaderni padani, VI, n. 29, maggio-giugno 2000