Rosamunda
|
Quell articol qì l'è scrivud in Lombard, cond l'ortografia Scriver Lombard. |
La Rosamunda o Rosmunda († Ravena, 572) l'è staita una rejina lombarda, moier de l'Alboin.
Biografia Modifega
La Rosamunda l'era la s'cieta del sovran dei Jepids, Cunimond, vencid e copads in bataia de l'Alboin ind el 567. Despos l'è staita ciapada come moier del sovran lombard, fors per ligar-s i Jepids restaits. La nœva rejina l'è insé indaita adree al so om ind la granda conquista-migrazion de de là dei Alp, ind el 568.
Segond la tradizion lombarda, reportada del Paol Diacon, un dé la saress staita obligada de l'Alboin – de probabel imbriag – a biver ind una copa faita cond el crani del so pader, e per vendicar-s l'havress organizad ol mazament del marid insema a l'Elmiqi, scuder del sovran qe l'era deventad ol so amant, ind el 572. Segond dei oltre fonts, manc ligade a la lejenda, al saress stait un tentativ de colp de stat organizad de l'istess Elmiqi, decorde cond la rejina e una part dei trupe jepide e lombarde, sostegnid de l'Imper d'Orient. Anca se i conjurads i è rivads a copar ol sovran, i ge saress miga rivads a ciapar ol poder per la granda oposizion del popol.
De tute i manere, a la fin la Rosamunda l'è scapada a Ravena insema a l'Elmiqi e la fiœla de prim leit, Albsuinda, cond el tesor real. Qé i duu amants i se saress sposads, per pò litigar e copar-s vun cond l'olter, fors cond el tosseg.
Bibliografia Modifega
- (LA) Paol Diacon, Historia Langobardorum.
- (IT) Jörg Jarnut, Storia dei Longobardi, Torino, Einaudi, 2002.