Foppon de Milan
La Rotonda de la Besana (Rotonda di via Besana in Italian), cognossuda on temp come Foppon e incoeu anca domà 'me la Besana o la Besa (in tra i generazion pussee giovin), l'è ona costruzion barocca de Milan.
La se troeuva tra via Enrico Besana (de chì el sò nomm de incoeu) e via Regina Margherita, minga lontan de Porta Vittoria e di sò vegg Bastion. L'è on gran portegh con dent ona gesa che al dì d'incoeu l'è desconsacrada e la fonziona 'me spazzi per i esposizion.
Storia
ModifegaOn temp a l'era el cimiteri de la Cà Granda e l'era cognossuda 'me Foppon. La gesa che gh'era denter l'era dedicada a San Michee, e l'è stada fada sù in del 1696. In del 1719-1731 i gh'hann faa tutt intorna el portegh. Gh'hinn staa sevelii almanch 150.000 personn.
In del 1787 l'ha desmettuu de vess on cimiteri, perchè i legg noeuv di Austriegh diseven che i foppon podeven minga vess denter la zenta di Bastion (e, in general, dent i mur di città).
Ai temp del Regn Italigh (1805-1814) gh'è stada l'idea de fà vegnì el Foppon on quaicoss compagn del Panthéon de Paris: on sitt indove mett i corp o i scender di quei personn che aveven servii el Paes (soldaa, magistraa, scienziaa, omen de coltura). Tra quei che gh'avarissen avuu de vess sevelii in del noeuv Panteon gh'era el general Pietro Teulié e 'l scrittor e poeta Melchiorre Cesarotti. Quand hinn tornaa i Austriegh però l'è andaa a monton tuscoss, anca se per on quai temp anmò i gent hann ciamaa el Foppon anca Panteon.
Inscì la Rotonda l'è vegnuda on sitt indove se metteven i varolaa, poeu l'è stada ona caserma, on fenil e la lavanderia de l'Ospedal. Del 1958 l'è proppietà del Comun de Milan, che l'ha faa vegnì on parchett e on spazzi per moster, esposizion e alter lavorà colturai.
In del 2014 l'è vegnuda la sede del MuBa (el Musee di Bagai).
Vos correlaa
ModifegaBibliografia
Modifega- Giuseppe Banfi, Vocabolario milanese-italiano, 1870.
- Giorgio Caprotti, Milan in saccoccia, ed. Libreria Milanese, 1994.