San Giuli

Quest articol chì l'è scrivuu in lombard, grafia milanesa.

El Giuli (latin: Iulius; Egina, ...- Isola d'Orta, 390) l'è staa on religios gregh. Insemma al fradell Giulian l'è staa quell che l'ha menaa el Vangeli in de la zona del Lagh d'Orta e de l'olt Noares.
A l'è consideraa on patronn di magutt.

El San Giuli che 'l scascia via i biss de l'Isola.

Vita

A la fin del IV secol i duu fradei Giuli e Giulian, che rivaven de l'isola de Egina, hinn rivaa in su la riva del Lagh d'Orta e s'hinn dedicaa, cont el permess de l'imperador Teodosi I, a trà a bass i templi pagan e a tirà su i ges. La storia la cunta che 'l Giuli l'abbia lassaa al fradell el lavorà de tirà su a Gozan la gesa quella di novantanoeuv, intant che lu l'era dree a cercà foeura el sit per quella numer cent. Rivaa denanz a l'isola del Lagh d'Orta, l'ha deciduu che quell l'era el sit giust, però gh'era nissun che 'l podeva portàll in barca. Donca l'ha ciappaa el sò mantell e l'ha navigaa de soravia a quell. In su l'isola, el Giuli l'ha battuu di dragh e i biss che ghe viveva dent (tucc simboi de la superstizzion pagana). La gesa che l'ha miss in pè la saria a la bas de quella che gh'è anmò incoeu in su l'isola.

Varda anca

• San Giulian
• Isola