Lumbard ucidental Quest articol chì l'è scrivuu in lombard, grafia milanesa.

El San Vincenz (latin: Vincentius; Huesca, ... - Valencia, 22 de genar del 304) a l'è staa on diacon e on marter roman, veneraa 'me sant de la Gesa Catolega e de la Gesa Anglicana.

Autor anonem de la scoeula de Francisco Ribalta, San Vincenz in preson, secol XVII.

Vita Modifega

Segond la tradizzion pussee sigura l'è nassuu a Huesca, ai pè di Pirenee, ma gh'è on quaidun che 'l dis che 'l saria poduu nass anca a Valencia o a Saragozza.
L'era de ona fameja nobela, fioeu del consol Eutichi e de la matrona Enola; el Vincenz el gh'ha 'vuu on'educazzion tipega de la gent de la soa posizzion. Destinaa ai letter, l'è staa menaa del pader al Valeri, vescov de Saragozza, perchè 'l ghe pensass lu a la soa formazzion spiritual. El vescov el l'ha nominaa arcidiacon, l'ha consideraa el sò brasc dester e 'l gh'ha daa l'incaregh de predicà per lu.
Ma intant el Dioclezzian l'ha descadenaa la soa persecuzzion contra i cristian. El Vincenz e 'l Valerian hann minga voruu scondes per la fed soa de lor, e hann seguttaa a testimoniàlla. Per 'sta reson el Dacian, prefett de la provincia spagnoeula, j'ha faa mett in preson. Lilinscì j'hann fustigaa, torturaa e poeu infina mazzaa.