Sira
La sira (o sera) l'è ona part del dì, che la varia a segonda di coltur. La rapresenta, a bon cunt, la fin del dì, l'ultem moment prima che la riva la nocc.
Colturalment, a gh'è interpretazion diferent in sul princippi e la fin de la sira. In Italia despess la vegn sconfonduda cont el termen de nocc; in Francia, inscambi, la sira l'è 'l moment in tra el tramont e la mezzanott (cioè l'ultem quart de dì in sui 24 or). In ingles inveci la sira l'è 'l moment indè che la diminuiss la lus del dì, e donca l'è comprenduu in tra la bassora e la nocc vera e proppia.
La parolla sira la vegn del latin (dies) sēra; l'agetiv sērus el voeur dì "tard". El termen el vegn doperaa anca in alter lengov romanz (italian sera, frances soir, romen seară, romancc e ladin seira), intant che in alter lenguagg se doperen paroll derivaa de la veggia forma latina "vesper" (per esempi, in del catalan vespre). In frances la parolla "soir" l'è maschil.
