Chest artícol a l'è scricc in Lumbàrt, ortograféa orientàl unificàda.


Ol Tasì (o anca taxi en ingles) l’è ün aütoveìcol (màchina, pulmì, ma ach öna barca, ecc) che ‘l pórta ‘n gir ü o piö pasegér.

I tasì zalcc de Nöa York.

A diferènsa di óter servése de traspòrt pöblech, söl tasì l’è ‘l pasegér che l’ decìt ‘ndóe l’ völ ‘indà in del momènt che ‘l salta sö söl tasì. I tasì i se tróa ‘n di pòscc indóe la pasa tata zét, isé de sólet i spèta i clièncc fò di stasiù di tréni, di areopòrcc, ecc, ma gh’è ach öna centràl telefònega che la ciàpa i ciamàde di pasegér isé che ‘l tasì ‘l vàghe a ciapà ‘l pasegér sóta cà o ‘ndóe chèsto l’ se tróa.

Ol guidadùr l’è ciamàt tasìsta e per fà chèsto mestér l’ gh’à de ìga öna licènsa che se la ciàpa ‘n cümü; in Lumbardéa i tasì i gh’à de ès biànch, i gh’à de ìga quàter pórte, öna tàrga lüminùza söl tècc con scricc sö TAXI e ‘l tasàmeter. Ol tasàmeter, che l’ gh’à de ès omologàt, l’è ü machinàre che l’ sèrf per stabilì ‘l prése de la córsa e ‘l prése l’ dipènt da la stràda che gh’è de fà e dal tép che ghe se té a fàla.

Ol nòm Taxi Modifega

Sömèa che ‘l nòm taxi l’ vègne da öna famèa del Cornèl in de la Al Brembana, la famèa di Tas, la stèsa famèa del Torquato Tas.

Chèsta famèa l’à prima ‘nventàt ol servése postàl per i privàcc e pò l’è ‘ndacia a stà de cà ‘n Germania, ‘ndóe la s’è ‘mparentàda con la famèa todèsca di Thurn e l’ sò cognòm l’è stacc todeschizàt in Taxis, Thurn und Taxis.

 
Ü motoscàf – tasì de Venésia.