Tux (Linux)

Quest articol chì l'è scrivuu in lombard, grafia milanesa.

Tux a l'è la mascotte del Kernel Linux, fada del Larry Ewing in del 1996. A l'è 'n pingoin pacciaa e alegher.

Tux

La scerna de la bestia la deriva de la passion del Linus Torvalds per i pingoin, dopo che l'è staa cagnaa de vun de lor al zoo de Canberra.

Tux a l'è 'na vera icona de Linux e per i linuxian, tant che 'n quaj Linux User Group l'ha adottaa di pingoin al zoo e 'n poo de gioeugh de la comunità open source el veden protagonista, 'me Super Tux, Tux Racer e Super Tux Kart, e anca di alter software de utilità, soratutt per fiolitt, 'me Tux Paint, a hinn dedicaa a lu.

Àlter mascotte de Linux

In del 2009, in corrispondenza cont ona conferenza in Australia e in la version 2.6.29 del Kernel Tux a l'è staa sostituii de Tuz, on diavol de la Tasmania cont on becch fals, per sensibilizzà in sul ris'c de estinzion de 'sta bestia.

In la version 3.11-rc1 del kernel, per scherzà in sul Windows 3.11, Tux a l'è staa mittuu insemma a 'na bandierina stile Windows.

Riferiment

• Why Is The Penguin Tux Official Mascot of Linux? Because Torvalds Had Penguinitis!
• Linux penguin mascot gives way to Tuz

Vos corelaa

• Tux Droid
• Hexley
• Beastie
• Mozilla (mascotte)
• Konqi
• Kiki el ciber-scoiattol