Vial Fulvi Test
|
Quest articol chì l'è scrivud in lombard, con la Noeuva Ortografia Lombarda |
El vial Fulvi Test (viale Fulvio Testi in italian) a l'è un stradon de Milan che 'l scomincia in piazzal Istria, 'me continuazzion del vial Zara, e 'l riva - per un tochell - a Sest e poeu a Cinisell indova che, infin, el cambia nom in vial Brianza in corrispondenza con la sortida de l'Autostrada A4 e la riva poch dopo a Monscia.
A l'è stad fad su in tra i agn 20 e 30 del secol quell de vint, in d'un'area che prima l'era coltivada, inscì de dàgh a Milan 'na strada alternativa per el caploeugh briantee oltra al vial Monscia. Per fàll gh'hann havud de quatà un bell toch del Seves, roba che l'è andada inanz fina ai agn '60. A l'è fad, in tra Milan e Sest, de do carrensge a sens unegh centrai, do corsie per el tram e du contraviai pussee piscinit, menter a Cinisell gh'è do carrensge partide de 'n spazzi alberad.
Ghe passen sora i tram 5, 7 e 31 de la Red di tram de Milan e sota gh'è la linia M5 de la metropolitana milanesa, cont i stazzion de Bignami, Ponal, Bicoca, Cà Granda e Istria che inn sota el vial.
Bibliografia Modifega
- Giuliana Gramigna, Sergio Mazza, Milano. Un secolo di architettura milanese dal Cordusio alla Bicocca, Hoepli, Milano 2001. ISBN 88-203-2913-1.
Alter proget Modifega
Wikimedia Commons el gh'ha dent imagin o alter archivi su Vial Fulvi Test
