Villa Viscont d'Aragona

Quest articol chì l'è scrivuu in lombard, grafia milanesa.

La Villa Viscónt d'Aragona, conossuda anca come Villa Viscónt d'Aragona De Ponti o Villa De Ponti a l’è ‘na villa nobiliar del sècol quèll di sèdes presenta a Sest San Giovann. Al dì d’incoeu a l’è la sede de la Bibliotècca Centràl, de la Civica Fototècca Nazional Tranquillo Casiraghi, oltre a 'vègh denter l’assessoràa a la Cultura del Comun de Sèst San Giovann.

Cortil de la Villa Viscont d’Aragona, Via Dante,6 Vicol de Ponti, Sest San Giovann

Stòria

A gh’è nò di notìzzi sicùr quant a la giusta data de costruzión de la villa: in di notìzzi del 1532 se pòden rilevà di testimoniànz de la presenza, d’ona casa padronàl cont ona Cort, on òrto e ‘n pozz in del sit doe che incoeu gh'è la villa. Del 1601 la proprietà de la villa l’è passada a la famiglia Selvini e in séguit a la famiglia Malombra e in del 1654 la ghe ven ceduda al cont Carlo de Belgiojoso che la destina a ca’ de campagna e fond agrìcol; a chi temp là la villa l’ospitava on allevamént de bigàtt e ‘n tòrc. A metà del ses’cent la villa la passa a la famiglia Parravicini; a l’è in quèll perìod là che la succéd la svòlta culturál de la villa Viscont d'Aragona: i intèrni del complèss s’impienìssen de affrèsch pregiàa al piàn nòbil e insèma la ven tiradfa in pee 'na pinacotèca sòta l’órdin del Giovanni Antonio Parravicini. On inventari del 1721 el registra che ind la pinacotèca ghe fudèss 'na collezión de tel che gh’hànn su di paesàgg, di natùr mòrt o in géner di soggètt, di lavorà di pittór fiamminghi, olandés, ma anca di pittór italián conossùu: el Cesar De Sèst, el Guglièlmo el Borgognón e 'l Caravàgg. La ricca pinacotèca del Parravicini l’è andada dispèrsa e venduda a la definitiva, per quattà i dèbet di famili che ‘a hinn vegnùu voeuna adrée l’altra proprietari de la villa .

Al princippi del sècol quèll di desdòtt la villa la risulta de proprietà di Viscónt d'Aragona, el sècol adrée la passaràa ai Viscónt-Borromee, poeu in di Ottolino-Viscónt e poeu de noeuv in di Visconti d'Aragona. Sti chì hinn stàa obligàa a dala via, in del 1873, ai sò massée, la famiglia borghesa De Ponti. I De Ponti spartìssen la villa in trìi còrp principàj: vun el ven fittàa, vun àlter l’è doperà per ona abitazión padronál e ‘l tèrz per ona filanda, voeuna di primm de Sèst, che l’è stada de fàtt ona manifestazión innànz del temp de l'industrializzazion che l’èra drée a vegnì. In del 1964 la Villa Viscónt d'Aragona De Ponti la ven aquistada del Comùn che, in del 1980 la restaura sòta ‘l progètt de l’architètt Amedeo Bellini: ai chi temp là tutt el complèss l’era in di condizión de stabilità precaria; la stabilitura de denter l’era stada ruinada de l’umidità e i affrèsch i èren stàa stàa streppàa vìa e miss su de noeuv in su di noeuv suppòrt. I locàj hinn stàa svoiàa e adattàa per ospità el pes di lìber de la bibliotècca. .

Caratteristich

La villa la se troeuva in del coeur del cénter stòrich de Sèst, in vìcol De Ponti (Via Dante 6) arenta a la pìccola gesa baròcca dedicada a la Santa Maria Assunta. El cancèll de fèrr buttùu l’introdùss al pòrtich con di colònn de órdin dòrich. A sinistra el cortìl l’è avèrt vèrs on edifizzi bass, che adèss el ven ciamàa el treatrìn e 'na vòlta l'era destinàa a rimèssa o magazzìn. Denánz, allineà al vìcol de entrada e nò al center de la cort, l’è logàa el pòrtich avèrt de l’antiga casa padronִál. A destra, sòta el pòrtich ona scala piscinina la mena ai piàn de sora. La cort la gh’hà quatter lati, i ambiént de denter i éren fàa su d’on gran salón e trìi stanz pussée piscinìnn al pian de bass, inscambui al primm pian se trovaven noeuv stanz e sora el pòrtich la gallaria de rappresentanza.

I affrèsch che guarnìssen la gallaria hinn stàa disegnàa in occorrenza del sposalizi del Giovanni Antonio Parravicini con la Francesca Castiglioni, in del 1680 e de denter hinn rappresentàa i stèmma di spós, el cigno di Parravicini e ‘l león dei Castiglioni. Di àlter affrèsch rappresenten la Liberalità o Lussuria, che la ten de ‘na part on dado e de l’altra i òr e i danée, la Sapienza cont on lampada a oli e ‘n liber, la Ricchezza cont ona coròna in man e on scètter de l’altra e la Fortèzza o Guèrra armada con ona lancia e ‘n scud. Di àlter affrèsch fann vedè di fiolètt e di ornamènt floreáj, di paesàgg con di vedùd e di figùr de mitologia. I lavorà gh’a hinn attribuìi a l’Agostino Santagostino, per via di analogìj cont el ciclo allegòrich secolàr de la villa Casati Stampa di Balsom, che la risalìss a l’istèss temp. L’ornamént de l'ancova arénta a la gallaria a l’è ‘n lavorà de divèrsi artista.

In del giardìn de la villa, che la soa pupàrt l’è stada trasformada ind on giardìn pùblich, a hinn logàa di rèst de marmor de ‘n cèrt interèss: ona colòna che la risàl al perìod romàn e ‘na pìccola font battesimàl del perìod del primm Cristianesim. Com’a l’è che sti repèrti chì sìen rivà finn al giardìn de la villa el se sa minga. in del giardìn a gh’era ancasì on pìccol pozz del ses’cent cont ona ruzèlla, che del perìod de costruzión de la villa .

D’estaa la cort de l’edifizzi la ven allestida per di spettàcoj a la serèna.

‘N'ala de l'edifizzi la gh’hà denter el CESPI (Centro Studi Problemi Internazionali).

Bibliografia

• Athos Geminiani, Toni Nicolini, Cultura e paesaggio a Sesto – Le Ville, Milano, Vangelista, 1984. (ISBN miga dispunìbil)
• Ezio Parma (a cura di), Famiglie e dimore patrizie, Sesto San Giovanni, Ezio Parma Editore, 1995. (ISBN miga dispunìbil)
• Pietro Lincoln Cadioli, Sesto San Giovanni dalle origini ad oggi, Sesto San Giovanni, Edizioni "Il cavallino d'oro" - Arti Grafiche G. Beveresco, 1976. (ISBN miga dispunìbil)
• '.Maria Teresa Binaghi Olivari ... [et al.] Affreschi a Sesto San Giovanni : cicli decorativi nelle ville del territorio, Sesto San Giovanni, Cassa rurale ed artigiana di Sesto San Giovanni, c1998

Vos correlad

• Sest San Giovann
• Villa Mylius
• Villa Puricelli Guerra
• Villa Torrètta
• Villa Zorn
• Casa Cotechini

Ligamm de foeura

• Viaggio nella storia di Sesto: le ville storiche - Comune di Sesto San Giovanni. URL consultad in data 11 aprile 2014. (arqiviad de l'url orijenal in data 31 marzo 2014)
• Modell:LombardiaBeniCulturali
• Piano di Governo del Territorio - Allegato B4, Ville storiche. URL consultad in data 11 aprile 2014. (arqiviad de l'url orijenal in data 7 aprile 2014)