Virus oncolitegh
|
Quest articol chì l'è scrivud in lombard, con la Noeuva Ortografia Lombarda |
Un virus oncolitegh a l'è un virus che l'infeta e 'l copa in manera preferenziala i cellule del cancher, inscì che 'l destrugà midem di cellule, cont el dà foeura de noeuv virion, el contribuiss al destrugà del cancher. Se pensa che, oltra a destrugà i cellule in question, menen anca el corp a fà 'na resposta imunitaria pussee forta contra de lor.
Sgiamò al principi del secol quell de vint i dotor haveven notad che gh'è di virus che paren boni de fà andà pussee lent un cancher o anca fàll descomparì, l'è però di agn 1960 che se studien de precis per quella reson chi: di virus che inn stad doperad per la lota al cancher inn vari tipi de adenovirus, reovirus, vaccinia, el morbillivirus de la fels, l'Herpes simplex virus e la malatia de Newcastle. In la pupart di cas, 'sti virus chi inn ingegnerizad aposta per tacà un cancher specifegh, ma ghe n'è anca in natura.
El prim virus oncolitegh aprovad de 'n autorità a l'è stad l'ECHO-7, virus natural acetad di autorità lituane in del 2004 'me cura contra vari melanoma, ma l'aprovazzion a l'è stada tolta via in del 2019. In del 2005 i auturotià de la China aproven l'adenovirus oncolitegh H101 per tratà el cancher del coo e del coll, in del 2015 el T-VEC l'è aprovad in l'Union europea e in di Stat Unid contra i melanoma inoperabel in stadi bell inanz.