Vittorin de Petòvi

Quest articol chì l'è scrivuu in lombard, grafia milanesa.

San Vittorin de Petòvi (250- 2 november 304) a l'è staa on vescov e martir pannònich. L'è staa el primm esegeta latin.

Biografia

Domà a partì de la segonda metà del III secol a gh'emm notizzi segur di ges in de la region danubiana: vist che però quei là paren vess perfettament organizzaa, devom pensà che sien nassuu molto temp innanz. E l'è in voeuna de quei ges, quella de Petòvi (al dì d'incoeu Ptuj, in Slovenia), che vers el IV secol el se trovava el vescov Vittorin, mòrt duranta i persecuzion del Dioclezian.
El Vittorin l'è staa on esegeta de la Bibbia, e per gionta in Latin. El San Gerònim en parla inscì: Vittorin, vescov de Petòvi, saveva minga el Grech come 'l Latin. Inscì i sò òper paren òttimm per el contegnuu, ma cont on stil fess difficil.

L'ha imparaa la teologia de l'Irenee e se pensa che l'abbia visitaa anca la biblioteca de Gerusalemm.

Òper

Trai sò òper esegetich pòdom cuntà di comment a liber biblich come la Genesi, l'Esod, el Levitich, Ezechiel, Abacuc, el Cant di Cant e a l'Apocaliss, senza cuntà on Trattaa contra i eresii, on alter sora la Creazion del mond e tanti alter. A numm ne resten domà el comment a l'Apocaliss (Commentarii in Apocalypsim Ioannis) e quell sora la Creazion (De fabrica mundi).

Dottrina

De quell che pòdom legg, la soa dottrina l'è stada molto ispirada de quella de l'Evangelista Giovann.
In di sò liber pò vess trovada ona certa propension al millenarismo.

Bibliografia

Martine Dulaey, Victorin de Poetovio, le premier exegete latin, Paris, 1993.
Enrique Molinè, Los Padres de la iglesia. Una guia espiritual, Madrid, 1982.
Berthold Altaner, Patrologia, Roma, 1997.
Lorenzo Dattrino, Padri e Maestri della Fede. Lineamenti di Patrologia, Padova, 1994.
Vittorin de Petòvi, Òper, a cura de Maria Veronese, Roma, Gorizia, 2002.