Yukon (fium)

Quell articol qì l'è scrivud in Lombard, cond l'ortografia Scriver Lombard.

Ol Yukon l'è ol fium plussee important del stat ameregan de l'Alaska. Al nass in Canada, ind el territori del qual l'ha ciapad ol nom (Territori del Yukon) e dop 3.185 km al se desvœia ind el Mar de Bering cont un delta ; ol so basin imbrifer l'è grand 840.000 km², qe l'è inscià a dir tre volte l'Italia. Jeneralment l'è jelad de oitober-november infin a april-maj.

Ol percors del fium.

Vista la longeza, la so importanza l'è miga tropa, soratut perqè al traversa dei zone q'inn propi poc popolade (l'è assee pensar qe in 3.185 qilometr de percors, se incontra domà 4 ponts stradai); l'è stait plussee important ind i agn 1898-1899, quand qe g'è staita la corsa a l'or ind el Klondike (qe l'è un fium plussee picinin, so afluent).