Lombard Quest articol chì l'è scrivud in lombard, con la Noeuva Ortografia Lombarda

L'Antonio Brioschi (ca. 1690/1700 – ca. 1750), a l'è stad un composidor italian, ativ del 1725 al 1750 a Milan e sit arent. El faseva part de la scoeula sinfonega milanesa, segond per importanza domà al Giovanni Sammartini, forsi so maester.[1]

Biografia Modifega

La pupart de la biografia del Brioschi la resta ancamò descognossuda. El par che 'l sia nassud in di agn '90 del 1600 o in di prim agn del 1700 e che 'l sia mort in di prim agn '50 del 1700, ma nissun di so autograf a l'è stad identifegad e a gh'hem minga informazzion precise in sui date di composizzion di so sinfonie.[2]

Cognossom però i date de tre sinfonie scrivude in tra el 1733 e 'l 1734 circa. Vuna di tre, la sinfonia in Sol magior, la vegn sonada in de la cerimonia de inaugurazzion de la Sinagoga de Casal Monferrad in de l'otober del 1733. I olter do sinfonie, datade 1734, inn a la Biblioteca Civica "Giovanni Canna" de Casal Monferrad, in su manoscrit.

Ancaben che l'atività del Brioschi la sia stada in de la cità de Milan o arent, i so sinfonie eren assee spantegade foeura de l'Italia e inn soravivud in quaranta biblioteche in Europa e Nord Amerega, soratut a Paris, Praga, Stocolma e Darmstadt,[3] sia in cobie de manoscrit del XVIII sec. sia in noeuve edizzion a stampa publegade del ca. 1741 al ca. 1760 a Paris e a Londra.[4]

Oeuvre Modifega

I sonade publegade in realtà inn sinfonie.

  • 12 sonade per 2-3 violin e bass continov, op. 1 (sol mag., si mag., la mag., sol mag., fa mag., mi mag., re mag., do mag., si mag., re mag., fa mag.; 1741-2)
  • 6 sonade per 2 violin, vioeula e bass continov, op. 2 (sol mag., mi mag., fa mag., sol mag., mi mag. si mag.; 1745)
  • 4 sonade per 2-3 violin e bass continov (si mag., si mag. mi mag., si mag.)
  • 6 sonade per 2 violin e bass continov (mi mag., mi mag. la mag., si mag., sol mag., sol mag.)
  • Sinfonia in mi mag.
  • Sinfonia in la mag. per 2 violin, vioeula e bass continov
  • 91 in tra sinfonie a quater, concertin a tri e quater e sonade a tri.
  • 51 in tra sinfonie, concert e sonade a tri
  • 25 sinfonie de dubia atribuzzion

Oeuvre perdude Modifega

  • Quartet per violin
  • 11 sinfonie
  • Concert per 2 oboi e orchestra
  • 2 sonade per 2 violin e bass continov

Bibliografia Modifega

  • Symphonic Repertoire, the Eighteenth-Century, Volume I, Mary Sue Morrow e Bathia Churgin, A. Peter Brown, Founding Editor

Note Modifega

  1. Churgin e Russell/BRIOSCHI GARLAND, p. xii
  2. ''Symphonic Repertoire, the Eighteenth-Century, Volume I,'' Mary Sue Morrow e Bathia Churgin, A. Peter Brown, Founding Editor, p. 135
  3. Una lista di biblioteche la gh'è in Mandel-Yehuda/AUTHENTICITY
  4. ''Symphonic Repertoire, the Eighteenth-Century, Volume I,'' Mary Sue Morrow e Bathia Churgin, A. Peter Brown, Founding Editor, pp. 135, 136