Apostuj Capitel Vintquater

Quel articul chì l'è scrivüü in Lumbard, cun l'urtugrafia insübrica ünificada.

Apostuj

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vintquater

¹E despö de cinch dì, el sacerdott scèff Anania l'è naa giò cun un quij anziann e un uradúr, un cèrt Tertüli, i quij hann cumparii al capp cuntra Paul. ²E quand l'è staa ciamaa, Tertüli l'ha cumenzaa a fà un'acüsa, disend: «Avend utegnüü tant pas per via de tì e i refurm che hinn sücess a la nostra naziún per via de la tua previdénza, ³in d'ogni möd e depertütt te ricevum, ecelentissim Felis, cun tücc grazi. ⁴E perchè mì t'impeda pü, te preghi de scultàmm cürtamént in de la tua gentiléza. ⁵Già che despö che avevum truaa chèst omm una pesta e vün che 'l möv rivolt intra tücc i Giüdee che hinn in del mund e l'è capp de la sèta di Nazarénn, ⁶el qual l'ha tentaa de prufanà anca 'l témpi, el qual anca èmm brancaa, ⁸del qual, despö che te l'hee esaminaa tì medemm, te pudaree savè sü tücc chèst robb di quij nümm l'èmm acüsaa». ⁹E anca i Giüdee hinn staa d'acordi, dand cunferma che chèstcoss staven inscì.
¹⁰E Paul l'ha respundüü, quand el capp el gh'aveva faa un sègn de parlà: «Savend che de tant agn te see giüdes de chèsta naziún, cun fidüzia defendi i robb sü mì medemm: ¹¹Te pödet savè che gh'huu minga püssee de dudes dì del qual sun naa sü a Gerüsalèmm per adurà. ¹²E me truaven né in del témpi despütand cun quajdün o inzigand una fola, né in di sinagogh, né per la citaa. ¹³Né pöden presentàtt i robb sü i quij me acüsen adèss. ¹⁴E te cunfessi chèst, che segund la Via che ciamen sèta, inscì servi 'l Diu di pader, credend in de tüsscoss che hinn segund la lég e hinn scritt in di prufètt, ¹⁵avendugh una speranza in de Diu, la qual anca lur medemm riceven, che la ghe sta per vèss una resüreziún sia di giüst che di ingiüst. ¹⁶In de chèst anca mì medemm me sfurzi de avègh semper una cuscénza ireprensibila denanz a Diu e omen. ¹⁷E despö de tant agn, sun riaa a fà limosen e ufèrt a la mia naziún, ¹⁸intanta che fasevi chèst m'hann truaa pürifegaa in del témpi, no cunt una fola né cunt un tümült, ma un quij Giüdee de l'Asia, ¹⁹i quij gh'aveven de vèss scià denanz a tì e de fà acüsa, se gh'aveven quajcossa cuntra de mì. ²⁰O che chèst personn medemm disen qual misfatt hann truaa quand stavi denanz al sinedri, ²¹o sü chèsta vöna roba che huu criaa föra intanta che stavi intra lur, che: L'è sü la resüreziún di mort che incöö mì sun giüdegaa de vialter».
²²E Felis el i ha mandaa indree, perchè l'aveva savüü püssee esatamént i robb sü la via, despö che l'aveva dii: «Quand Lisia, el tribün, el vegnarà giò, decidaruu el voster cas. ²³E l'ha urdinaa al centüriún che 'l füss vardaa, e che 'l gh'avess libertaa, e che lü l'impediss nissün di sò propi personn de servìll.
²⁴E despö d'un quij dì, despö che Felis l'era riaa cun Drusila, sua propia miee, che l'era giüdea, l'ha mandaa a ciamà Paul e 'l l'ha scultaa sü la féd in de Crist Gesü. ²⁵E intanta che 'l cunversava cun lü sü la giüstizia, l'autucuntroll e 'l giüdizi che l'è 'dree a vegnì, despö che l'era devegnüü stremii, Felis l'ha respundüü: «Per adèss, va, e despö che truaruu 'l témp, te mandaruu a ciamà». ²⁶Al medemm témp, anca perchè 'l sperava che danee 'l gh'avarìa daa de Paul, dunca, el ghe mandava a ciamà püssee despess e 'l cunversava cun lü.
²⁷E despö che düü agn eren cumpii, Felis l'ha ricevüü un sücessúr, Porci Fest, e perchè l'ha vurüü guadagnà favúr cunt i Giüdee, Felis l'ha lassaa indree Paul ligaa.

Navigaziun

• ← Indree a Capitel Vinttrii
• Inanz a Capitel Vintcinch →
• A l'indes