Apucaliss Capitel Düü

Quel articul chì l'è scrivüü in Lumbard, cun l'urtugrafia insübrica ünificada.

Apucaliss

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Düü

¹«A l'angiul che l'è a Efes scrìv:
Lü che 'l tegn i sètt stèll in de la sua man driza, che 'l camina in de mèzz a i sètt candelee d'or el dis chèstcoss: ²Savi i tò oper e 'l laur e la tua perseveranza e che te podet minga purtà i malign, e t'hee pruaa lur che se ciamen apostuj e hinn no, e t'i hee truaa fals, ³e te gh'hee perseveranza e t'hee supurtaa per via del mè nomm e te see minga devegnüü strach. ⁴Ma gh'huu cuntra de tì: che t'hee lassaa el tò primm bén. ⁵Dunca, regurdatt de due t'hee burlaa giò e indrizatt e fa i tò primm oper; ma se no, vuu a tì e muvaruu el tò candelee del sò lögh, se t'indrizet no. ⁶Ma te gh'hee chèst, che t'udet i oper di Niculaitt, che udi anca mì. ⁷Lü che 'l gh'ha un urègg, che 'l senta chèll che 'l Spirit el dis a i gés; a lü che 'l ving, ghe daruu de mangià de la pianta de la vita, che l'è in del paradis de Diu».
⁸E a l'angiul che l'è a Smirn scrìv:
El primm e l'ültim, che l'era mort e l'è vissüü, el dis chèstcoss: ⁹Savi la tua tribulaziún e la puertaa--ma te see sciúr--e la biastema di lur che disen che sien Giüdee e hinn no ma una sinagoga de Satana. ¹⁰Che te gh'hee minga paüra di coss che te stee per patì. Varda, el diaul el sta per bütà de vialter in de presún perchè siuv metüü a la pröva e che gh'àbiuv tribulaziún des dì. Che te devegnet fedél fin a la mort, e te daruu la curona de la vita. ¹¹Lü che 'l gh'ha un urègg, che 'l senta chèll che 'l Spirit el dis a i gés. Lü che 'l vinc el sarà minga culpii de la segunda mort.
¹²E a l'angiul che l'è a Pergamm scrìv:
Lü che 'l gh'ha la spada filada e a dübi taj el dis chèstcoss: ¹³Savi due te stee de cà, due [l'è] 'l tronu de Satana, e te tegnet sald al mè nomm, e t'hee minga negaa la mia féd anca in di dì d'Antipa, el mè testimon e 'l mè fedél, che l'era mazaa intra de vialter, due Satana 'l sta de cà. ¹⁴Ma gh'huu [coss] piscinitt, che te gh'hee là [quij] che tegnen sald a l'insegnamént de Balaam, che l'ha insegnaa a Balak a bütà una preja de scarpüsc denanz a i fiöö d'Israel de mangià [i coss] sacrifegaa a i idul, e de furnegà. ¹⁵Inscì te gh'hee anca tì quij che tegnen sald a l'insegnamént di Niculaitt in de l'istessa manéra. ¹⁶Dunca, revedett tì; se de no, vegni a tì sveltamént e cumbataruu cun lur, cun la spada de la mia buca. ¹⁷Lü che 'l gh'ha un urègg, che 'l senta [chèll] che 'l Spirit el dis a i gés. A lü che 'l vinc, ghe daruu de la manna scundüda e ghe daruu una preja bianca, e sü la preja un növ nomm scritt che nigün el sa, se no lü che 'l [el] ricev.
¹⁸E a l'angiul che l'è a Tiatira scrìv:
El fiöö de Diu, che 'l gh'ha i lur ögg cuma fiama de fögh e i sò pee cumpagn de brunz lüsént, el dis chèstcoss: ¹⁹Savi i tò oper e 'l bén e la féd e 'l servizi e la tua perseveranza e i sò oper ültim [hinn] püssee grand di primm. ²⁰Ma gh'huu cuntra tì che te permetet [a] la dona Jezebel, che la se ciama prufetèssa e l'insegna e l'imbröja i mè sèrv a furnegà e mangià [i coss] sacrifegaa a idul. ²¹E gh'huu daa témp perchè la revedèss, e la vör minga revedèss de la sua furnegaziún. ²²Varda, la büti in d'un lètt e quij che fann adültéri cun lee in d'una granda tribulaziún, se se reveden no di sò oper, ²³e i lur bagaj mazaruu cun la mort; e tücc i gés sarànn che mì sun lü che 'l cerca [i] mént e [i] cör e daruu a ognidün de vialter segund i voster oper. ²⁴Ma di a vialter, i rèst che hinn a Tiatira, tant quant gh'hann minga chèst insegnamént, che hann minga savüü i [coss] prufund de Satana, cuma disen: meti no un alter pés sü vialter, ²⁵ma tegnii sald a chèll che gh'avii fin chè [a] venga. ²⁶E lü che 'l vinc e che l'usserva i mè oper fin a la fin,
ghe daruu auturitaa sü i naziún,
²⁷e 'l i guernarà cunt un bastún de ferr
cuma i vas de creda hinn rumpüü in pèzz,
²⁸cuma anca mì huu ricevüü de mè pader, anca ghe daruu la stèla del dumàn. ²⁹Lü che 'l gh'ha un urègg, che 'l senta [chèll] che 'l Spirit el dis a i gés.

Navigaziun

• ← Indree a Capitel Vün
• Inanz a Capitel Trii →
• A l'indes