Ataru Moroboshi
Ataru Moroboshi (諸星 あたる Moroboshi Ataru?) a l’è on personagg immaginari e 'l protagonista de la serie manga e anime Lamù de l'autris Rumiko Takahashi.
Biografia Modifega
L’Ataru l’è nassuu el 13 de april[1], data fada su de duu nùmer che a inn consideraa descaviggiaa: de fatt in giappones el numer 4 a se pronuncia shi, cont on son assosènn arent a quell de la paròla shinu (mòrt). Quand che ‘l mònegh Sakurambo l’incontra el bagai per la prima vòlta ‘l le definìss ‘me "l'òmm pussee descavigiaa del mond", e 'n frach de avvenimént i confermarann ‘sti paròll chì in del cors de la serie: in del cors di aventur indoe l’è tiraa dent, l’Ataru el risulta quai semper ‘na vittima de la vicénda, l'unica o voeuna di tanti, e l’opinion pessima che i alter persònn i gh’hann de lù, je mèna a tràgh adòss a lù la colpa de tucc i mai, despess anca quand che la colpa l’è afat minga soa, senza concededegh a lor el benefizzi del dubbi.
L’Ataru el ven cataa foeura ‘me rapresentant di terrèster per evità l'invasion di alién. El sò incarich l’è quèll de partecipà a 'na gara contra ‘l rappresentant di alien (Lamù); per vinc e salvà la Tèrra el gh’ha des dì de temp per brancà i corni de la Lamù. L’Ataru el riess a vinc per d' on stratagèmma: per annullà el vantàgg de la Lamù (che l’è bòna de sgorà e slisà i sò tentativ de brancada) el ghe leva via el reggipètt e donca ‘l riess a tocàgh i corni e quand che lee la ghe và vesin per avègh indree a l’indument . Per la contentèzza l’Ataru el cria che ‘l sposarà la soa morosa Shinobu Myake; la Lamù la cred però che i paròll de l’Ataru i ghe sien rivolgiud a lee, la se innamora del fioeu e la tacca a comportass compagn che la fudèss la soa miee.
El rivà de la Lamù sara sù el morosament de l’Ataru e la Shinobu. A l’inviada lor du i tenten de andass visin vun con l’alter, ma come che la Shinobu la conoss el Shutaro Mendo (che 'l frequenta l’istèssa soa class de lor) la ghe se interèssa a lù, che el ghe pias comè a lee (ma cont el segutà a provà di sentimént per el Moroboschi, tant ‘me a se ved ‘na quai vòlta). Intanta lù el tacca a ciapà l’amor per la Lamu', che la ghe pias comè, e di vòlt i ghe càlen minga i manifestazión del sò vorè ben, ancaben che generalment el resta restìn in di sò confront, el seguta a 'ndàgh adree ai dònn che i ghe capiten sòttman e ‘l voeur minga ammètt che ‘l ghe voeur ben.
In fond al coeur a l’è inamoráa de la Shinobu Miyake ma di vòlt, per via del so contègn lascìv, el subìss la lontananza e 'l refùd de la tosa. A l’inviada a l’era on amor aclamaa, tant de dedull del fatto che el voréva sposalla e che, in del brancà su la Lamù restada cont el pètt defoeura, el cria al mond el so desideri inscì ‘me ‘l ven marcaa in de l’episòdi 11 quand che l'è 'dree a sfidà i fulmin de l’aliena adree a tut el tragìtt intanta che ‘l'è 'dree a 'ndà de la Shinobu, e poeu in del brasciass con lee. Pussee tard però lù el se destacca de la tosa, e anca lee la fa compagn de lù, e el par che ‘l sentiment so de lù el sia finid, nepunemánch l'anime la gh’hà dent di detàli che fann intend che ‘l sentimént, siben che sopii, el gh’è. A inn palesad di circostanza, tant ‘me quand che l’è gelos de la Shinobu putost che de la Lamù (varda l’episodi 39 e 46) o i aveniment al lunapark (ep 138): ‘me per esempi quand che l’è ‘dree a corr insèma a la Shinobu per scansà on’enorme giostra lì lì per crollà, che però la ris’cia de borlà giò anca in su di alter, compresa la Lamù. O anca quand che ’l finìss a fa on sògn indove el ghe deciàra a la Shinobu di de vorè tornàgh insema a lee e de vorèlla in sposa. (ep. 210).
In del cors del svilupp de la stòria, l’Ataru el se trovarà a gareggià cont el Shutaro e col Ten, el cusinètt de la Lamù. Tucc du i ghe vosen adree a l’Ataru per el sò contègn senza maner, per el vèss minga bon de controllà la fàmm e ‘l so fà de vun che ‘l gh’hà la mania del sèss; anca lor però i ghe varden adree comè ai tosann e i sò comportament vegnen accettaa domà per di convenzión sociai. I maner galant del Shutaro e l'atrazión istintiva che i tosann proeuven quand che stann con lu i ghe la fann a scond el fatto che lù el sia ‘dree a tentà de seduj; Ten inveci l’è ‘n fiolìn e l’intenerìss i tosànn che ghe veden nissuna malizia in di sò comportament e donca accetten de fass brascià de lù.
Personalità Modifega
A l’è 'n student mediòcher che ‘l scoeud né la stima di sò compagn de class né quèlla di sò genitor. Nonostant che el fudèss giovin (17 ann) l’Ataru el trà via nò i occasion de fàgh el fil a tucc i bèi tosànn che ‘l troeuva.
A l'è estremmament lasciv, e soratùtt (o almanch, de spèss a par inscì) stupid, imprudent, invadent, spudoraa, superficial, vun domà per lù, affama, e crappon. Quand che se tratta d’ottegnì 'n quaicòss (specialment in quant ai dònn) a l’è fint, spiòsser e gabador, e l’accètta nò de vèss battuu. Ma, amalastant la soa fila de difett duvis del sò caratter, in fond el gh’ha ‘n coeur d’òr (lù l’hà ajutaa i alter personagg in difficoltà pussee de 'na volta [2]) e, amalastant la soa inclinazion a resegà i tosann, el fà mai uso de la violenza in di sò confront. El dimostra realment de vèss intelligent quand che ‘l voeur, ma in generٔál el preferìss mantegnì i sò comportamént de idiòta e de fioeu.
Impunemànch el sia on terrèster a l’è on corridor eccezional (di volte el riva fina ai 70 km/h) , asca che on mangiador quasi insaziabel (domà el Rei, la Sakura e ‘l Sakurambo a hinn bon de fà a gara con lù e sorpassàll in ‘sti proeuv chì), e ‘l se tira su a la svelta di dagn fìsich (i catafìgh di tosann, i scòss elèttrich de la Lamù, i fiamm del Ten, i pugn del Ryūnosuke Fujinami, i esplosion e situazión doloros o pericolos comè). 'na persona che la par interessáda sinceramént a lù l’è la Lamù, sedòtta annavojand de l’Ataru al principi de la storia.
Podè e abilità Modifega
Doppiagg in la version italiana Modifega
In de la version giapponesa l’è doppiad del Toshio Furukawa, inveci in Italia la s'è succeduda 'na fila de dobbiador:
- el Riccardo Rossi, el Fabrizio Manfredi, e 'l Mino Caprio in del primm passàgg televisìv de la serie animada;
- el Massimo Corizza in la segonda part di episòdi de la serie animada;
- el Corrado Conforti e l'Alessandro Tiberi in l’ultima part di espisodi de la serie animada;
- el Paolo De Santis in di OAV;
- el Nicola Bartolini Carrassi e 'l Paolo Torrisi in di film distribuìi de la Yamato Video.
Nòtt Modifega
- ↑ Data rilevada in del primm capìtol del manga e in de l’episòdi 66 de l'anime, Buon compleanno.
- ↑ Come dimostràa in di episodi de l’anime El piccolo bruco (“El pìccol vèrmen”), “Arriva il tifone” (L’è ‘dree a rivà ‘l borineri) (dove aiutò Lamù, incastrada sòta ‘n mòbil e che l’era ‘dree per negà, desgià che in quell moment là la cà di Moroboshi l’era inlagada), Il fantasma e Appuntamento con un fantasma.