Cazzoeula (mangià)
La cazzoeula l’è on stuvaa de la tradizion lombarda faa cont verz e carna de porscell, tipegh de l’autugn e de l’inverna.
| Cazzoeula | |
|---|---|
 | |
| Origen | |
| IPA | [kaˈsøla] |
| Alter nòmm | cassoeula, cassoeura |
| Pòst d'origen |  Italia |
| Region | Lombardia |
| Dettaj | |
| Categoria | segond piatt |
| Ingredient principaj | verz e vari part del porscell |
Storia
ModifegaLa cazzoeula, inscì coma l'è fada incoeu, la nass a l'inizzi del secol quell de XX, ma la soa origin l'è minga certa.
Ona primma ipotesi la voeur che l’origin de la parolla cazzoeula la poeud vess collegada al temp de la dominazion spagnoeula in del Dugaa de Milan.
Quand che la gh’è stada la primma carestia, i autoritaa doveven dà de mangià a sbiocch che vegniven in cittaa per cercà on quaicoss de mangià e la cazzoeula di magutt l’eva dovrada coma unità de mesura per dà razion inguai don mangià faa cont i tòcch poeur de la lavorazion del porscell e cont la verdura de la stason. El dovrament de la cazzoeula, per la distribuzion del mangià dii indree, l’era staa stabilii del governador spagnoeu cont do vosaa.
La gh'è poeu ona leggenda che la dis che la nass don soldaa spagnoeu che l'era in amor dona tosa milanesa, coeuga dona fameia nobbila, e che el gh’eva insegnaa la recetta don mangià che poeu la tosa l’eva preparaa con success a i sò padron.
La version de l'origin al temp de la dominazion spagnoeula l’è mettuda in discussion de l’esistenza in del secol quell de XII don abitant de Busti Grand ciamaa mangiacaxöla, de chi el dubbi che l’origin de sto mangià la saria ancamò pussee veggia.
El passà di agn l’ha minga faa desmentegà ona pitanza povera ma bona: viduu che la mazza del porscell l’eva de l’istess dì de Sant’Antoni Abaa (17 genar), protettor di besti, la cazzoeula l’era anca diventada on mangià de ricorenza.
Ona poesia
ModifegaLa cazzoeula l'è on piatt de preparà
pussee cont el cervell che coi man
se se voeur, in sul seri, fa provà
el gust di milanes del noster Milan.
Costaioeur e pescin, va ben se sa,
coi codegh e coi verz, adree a la man,
mettuu dent in cassiroeula a morisnà
poeuden fa ona cazzoeula; ma el villan
ch'el se intend de porscell el dis "tegn a ment
che a preparagh la poccia ghe voeur un coeugh
ch'el sa quell che occorr de condiment
e ch'el saria bon de regolagh el foeugh:
la cazzoeula la gh'ha de vess ben ben tacchenta
e minga sbrodolada e sbrodolenta.
de "El ghiotton lombard" de Antoni Strazza
Ona recetta tradizionala
Modifega- 1200 g de verz (che hann tolt ona giazzada);
- 400 g de costaioeur de porscell;
- 200 g de codegh de porscell;
- 1 oreggia de porscell;
- 1 pescin de porscell;
- 8 verzitt;
- 50 g de scigoll fettaa;
- 50 g de carotol a daditt;
- 1 cogiaa de songia;
- Saa.
Ciapà ona cassiroeula granda e fà palpà i scigoll e i carotul in de la songia. Giontà el pescin spaccaa in quatter e fa coeus per 45 minutt.
Mett dent i codegh taiaa a quadraa piscinitt e i costaioeur, coeus per alter 90 minutt e giontà poeu i verzitt e i foeui de verza senza la costa central.
Finì la preparazion dopo alter 45 minutt o finna che la cazzoeula la sarà diventada ben tacchenta.
Compagnà cont polenta de melgon.
Variazion
Modifega- A Milan la se gionta la testina.
- A Comm se metten no el pescioeu e l'oreggia ma el se mett dent el vin bianch.
- A Novara la se mett dent anca la carna de occa.
- A Pavia se dovren domà i costaioeur.