Corriere della Sera
El Corriere della Sera (Corrier de la Sira in lombard) a l'è consideraa el pussee important quotidian italian.
Fondaa a Milan in del 1876 dal giornalista napoletan Eugenio Torelli Viollier, giamò direttor del giornal La Lombardia, el Corriere della Sera a l'è vun di pussee vegg quotidian italian e l'è anca al primm post per tiradura e spantegament[1]. I so concorrent principai hinn La Repubblica de Roma e La Stampa de Turin.
Storia Modifega
Giornal de riferiment d'i sciori milanes e sostegnuu da la borghesia lombarda, el gh'avuu fin dal principi on orientament liberal e moderaa, a rivà subit a fass notà per la ricchezza di so servizi giornalistegh e la cura de la part editorial. In di agn 10' del XX secol el Corrier a l'era devegnuu el primm quotidian nazional, grazie ai so collaborator 'me el Luigi Einaudi, el Luigi Pirandello, el Gabriele d'Annunzio e el Luigi Barzini ma anca grazie al so direttor Luigi Albertini, che'l gh'aveva ciappaa el post del Domenico Oliva in del 1900. In quei agn el giornal l'era devegnuu famos per dagh adoss al President del Consili Giovanni Giolitti e per avegh sostegnuu l'interventism in de la Prima Guerra Mondial[2].
In del 1925 el Corrier el g'ha dovuu allineass a i politegh de la dittadura fassista, a devegnì ufficialment on orghen de propaganda del regim, dirett al principi da l'Aldo Borelli dal 1929 al 1943 e despoeu da l'Ermanno Amicucci in di agn de la Republega Sociala Italiana. In quest period i hann scomenciaa a scriv per el Corrier duu di giornalist pussee importanti de la storia del giornal: l'Indro Montanelli e el Dino Buzzati[3].
Cont la Liberazion el quotidian l'ha voltàa nomm in Corriere d'informazione, devegnuu poeu sota la direzion del Mario Borsa il nuovo Corriere della Sera in del 1946 e a la fin a retornà cont el nomm originari de Corriere della Sera in del 1959.
In di agn '50 e '60 el giornal l'ha mantegnuu el so orientament moderaa, ma cont la direzion del Piero Ottone gh'è stada on avertura a i component politegh del center-sinistra, che in d'istess period i eren a dree a contribuì al Compromess storegh. Successivament gh'hinn staa on fracch de problemi quand in del 1981 a l'è stada desquattada la lista di member de la lobia P2, indove i eren denter on quaj esponent de la proprietà editorial del quotidian, che ai temp l'era controllaa da la cà editris Rizzoli.
In del 1986 el Corriere el s'è giontaa denter a l'RCS Editori, ch'el possed ancamò el giornal e ch'el g'ha nominaa tucc i direttor d'i ultem trent'agn, 'me el Ugo Stille, el Paolo Mieli, el Ferruccio de Bortoli e el Luciano Fontana.