Cros Verda Bagg
|
Quest articol chì l'è scrivud in lombard, con la Noeuva Ortografia Lombarda |
La Cros Verda Bagg (Croce Verde Baggio in italian) a l'è 'na sociazzion de volontariad fada su del 1911 a Bagg e ancamò ativa in del setor del socors sanitari: la gh'ha sed in Piazza Cesare Stovani, in del center del quarter.[1]
L'è part de l'Associazione Nazionale Pubbliche Assistenze.[2]
Storia
ModifegaLa sociazzion l'è fada su del 1911 'me ram baggin del moviment de la Cros Verda: in la banda de Milan el servizzi di publegh assistenze l'era propi ativ e un quaj ann prima l'haveva menad a la fondazzion de l'Assistenza Publega Milanesa e de la Cros Verda Milan che, al temp de l'influenza spagnoeula, se sgioten insema in d'una sociazzion unega.[1]
A fànn possibel la creazzion a l'è l'intervent de la Giuseppina Galanti Setti che, dopo che un so parent l'era mort perchè a Bagg calava 'n servizzi volontari de socors, la insubiss de fàlla su: la noeuva formazzion la gh'ha havud el suport de l'APM che gh'ha dad anca una letiga a man intant che i baggin podeven crompà un carr ambulanza. [1]
De quand che l'è stada fada su la gh'ha sed in la piazza central de Bagg, prima in d'una palazzina che l'è stada poeu trada sgiò per fà su i ofizzi del comun e, poeu, in la palazzina de adess del 1925, cont un temp in del mez in la palestra de la scoeula del comun: del 1912 a l'è fad su dent un ambulatori per i pover, vert un dì sì e vun no e gestid di dotor de l'Ospedal Magior. [1]
Con la fin de la prima guerra mondial e 'l tornà di baggit del front la sociazzion la se organiza mej e la met su un consili diretiv, che l'è bon de crompà, del 1925, un'autoletiga.[1]
'Me tute i sociazzion de socors a l'è desligada sota el fassism e mituda sota a la Cros Rossa Italiana: dopo de la liberazzion a l'è fada su ancamò ma per i prim agn la resta domà 'me centralin telefonegh de la Cros Verda ambrosiana: del 1947 i baggit ghe dann di prestit a bon tass insì che la poda tornà autonoma e del 1953 l'è crompada una noeuva autoletiga e la se motorizarà a la svelta, con desmila pazzient straportad del 1972.[1]
In ocasion di terramot del Friul del 1976 e de l'Irpinia del 1980 la sociazzion la mandarà di so mez e di so milizziot e la derva anca una catada de fond in tra la citadinanza.[1]
Del 1984 la sociazzion la crompa la prima ambulanza de noeuva concezzion, fondada in sul modell Fiat Ducato, cont el dent medicalizad e i struture de suport, e sostituarann i vegge autoletighe.[1]
Atività
ModifegaOltra che al socors la sociazzion la se ocupa de divulgazzion sanitaria per i citadin, con di cors de prim socors vert a tucc e atività de informazzion in la biblioteca del quarter.[1]