Daniele Ronda

Chest artícol a l'è scricc in Lumbàrt, ortograféa orientàl unificàda.

Ol Daniele Ronda (Piacènsa, 23 de utùer del 1983) l'è ü scritùr de cansù e cantànt folk emilià.

De s-cècc e i prim laurà

A 9 agn 'l và al Conservatòre Giuseppe Nicolini de Piacènsa, 'ndóe 'l istödia solfègio e pianofórt, menimà a 14 agn 'l tàca a stödià cant e pò l'à partecipàt a l’Accademia de Sanremo e al Festival de San Marino. 'l se mèt ach a scrif di cansù sò e 'ntàt che 'l se tróa 'n sàla próe e l'è dré a sistemà ü sò tòch per pianofórt ciamàt "Almeno stavolta", 'l la sènt 'l Alfredo Cerutti, manager del Nek, che 'l ghe domànda la cansù per fan ü sìngol pròpe per ol Nek. Chèsta cansù l'è riàda al prim pòst in di clasifiche de l'Italia e del Süd Amèrica e l'è stàcc ol prim sìngol del album "The best of Nek / L’anno zero" 'ndóe i gh'éra 16 vègie cansù del Nek e 2 cansù nöe, Almeno stavolta e L'anno zero, scrìce pròpe dal Daniele Ronda.

Scritùr de cansù

Dòpo 'i prìme dò cansù l'è 'ndàcc inàcc a laurà col Nek e 'l gh'à scricc tàce óter tòch de valùr: Lascia che io sia, Notte bastarda, Va bene cosi, Una parte di me (2005), Cri, Sei, Ancora un giorno di te, (2006), Tira su il volume (2009). Ol Daniele Ronda però l'à mia scricc cansù adóma per ol Nek, ma ach per di óter cantàncc: Amami in del 2006 per ol Massimo di Cataldo, Baciami adesso, portàda al Festival de Sanremo del 2008, 'ndóe ol Daniele Ronda l'à facc ach 'l arangiatùr e 'l produtùr artìstech, Guardami e Con il sole nelle mani per Mietta. L'à scricc ach di cansù dance e tra chèste ‘Desire’ del Dj Molella.

Ol cantautùr e 'l prim album

Tra 'l 2008 e il 2009, dòpo i 'ncontràt ol Jonny Malavasi che l'è dientàt ol sò manager, l'à decìt de mètes a cantà i sò cansù. In del zögn del 2009 'l se seràt dét in del istöde de registrasiù e 'l se metìt a scrif centinér de cansù e da töta chèsta fadìga 'l n'è egnìt fò 'l sò prim album ciamàt Da parte (anteprima edition).

Chèl album ché 'l gh'è sömeàt amò lìgat ai tép de quàndo l'éra scritùr de cansù e 'l Daniele Ronda l'è mia stài contét de come l'è egnìt, isé l'album dòpo ès istàcc istampàt l'é mia stài distribüìt. Dòpo ìga lauràt sùra amò 'mpó 'l l'à stampàt amò tùrna con 12 cansù nöe e 'l nòm ‘Da parte’, con sés aragiamèncc del Marco Falagiani e sés del Daniele Ronda, ma pò l'à fermàt per la segónda ólta la distribusiù. In del iscrif per la segónda ólta 'l sò album l'à tacàt a laurà col Sandro Allario e 'l sarà pròpe gràsie al Sandro Allario che fra 'l 2010 e il 2011 'l naserà la Folklub, la band del Daniele Ronda, che 'ntàt l'è pasàt al gèner folk e l'à tacàt a scrif ach in piasentì. In del noèmber del 2011 la é fò la tèrsa stàmpa del sò album adès ciamàt Da parte in folk che 'l vènt 5.000 còpie e che 'n del setèmber del 2012 'l ciàpa 'l PREMIO MEI” come “MIGLIOR PROGETTO MUSICALE SUL DIALETTO DELL’ANNO”.

La Sirena del Po

Ol 20 de noèmber del 2012, ü an dòpo che l'è egnìt fò 'l sò prim album, ol Daniele Ronda l'à püblicàt ol sò segónt laurà, ün albùm ciamàt La sirena del Po con 13 cansù nöe che in di prìme dò setimàne l'à endìt piö de 2.000 còpie. L'album l'è stacc presentàt ol prim de dezèmber con ü concèrt al Palabanca de Piacènsa 'ndóe i gh'éra piö de 3.000 pagàncc.

Discografia

I sò album

2009 - Da parte (anteprima version)
2010 – Da parte
2011 – Da parte in folk
2012 – La sirena del Po

Ol DVD

2012 – Tortelli e vino rosso

I cansù che la scricc

2003 - Almeno stavolta (Nek)
2004 - L'anno zero (Nek)
2005 - Una parte di me (Nek)
2005 - Lascia che io sia (Nek)
2005 - Notte bastarda (Nek)
2005 - Va bene cosi' (Nek)
2005 - Una parte di me (Nek)
2006 - Cri (Nek)
2006 - Sei (Nek)
2006 - Ancora un giorno di te (Nek)
2006 - Amami (Massimo Di Cataldo)
2008 - Baciami adesso (Mietta) (Sanremo 2008)
2008 - Guardami (Mietta)
2008 - Con il sole nelle mani (Mietta)
2009 - Tira su il volume (Nek)

Ol sò sìto

Ol sìto del Daniele Ronda Arqiviad qé: [1]