Domizia Longina
La Domizia Longina (Domitia Longina in Latin; 53-130) l'è stada ona imperadris romana, miee del Domizian. L'era la tôsa pusee giovin del general Gnee Domizi Corbulon e de la Cassia Longina. In del 71 la Domizia l'ha lassaa el sò primm marii, Lucio Eli Lamia, per òrden de l'imperador Domizian. Del matrimòni con quest'ultim l'è nasuu domà on fioeu, la mòrt del qual la pò vess la causa del contrast tra i duu in del 83. L'è diventada imperadris in del 81, dòpo l'andada in sul trono del marii, fina al 96, quand el Domizian l'è staa faa foeura.
Familia
ModifegaLa Domizia Longina la gh'ha de vess nasuda intorna al 53. L'era la nevoda de la Cesònia, miee de l'imperador Caligola. La sorela, la Domizia Còrbula, l'aveva sposaa el Lucio Anni Vincian. Sia el Corbulon che el Vinician se hinn faa foeura dòpo el falliment de la congiura de Pison contra el Neron.
De la vita de la Domizia prima de sposà 'l Domizian se sa assee pòcch, a part che la s'era maridada cont el Lucio Eli Lamia, on òmm de la class di senator (e consul in del 80).
El matrimòni cont el Domizian
ModifegaDòpo la mòrt del Neron e l'Agn di Quatter Imperador, la noeuva dinastia imperial a l'era quella di Flavi. L'imperador Vespasian l'aveva cercà de fà sposà al sò fioeu minor, el Domizian, la Giulia Flavia, che inveci l'era la tôsa del sò alter fioeu, el Tit. Ma el Domizian el s'era inamoraa pròpri de la Domizia Longina e l'aveva convinciuu l'Eli Lamia a fà el divòrzi. El matrimòni el convegniva a la Domizia perchè inscì l'onor de la soa familia (finii in disgrazia per i persecuzion neronian contra 'l sò pà) el vegniva restabilii. In del 73 l'è nasuu el lor primm fioeu, che però l'è mòrt on quai de agn dòpo (tra 'l 77 e 'l 81). In del 81, dòpo la mòrt del fradel, el Domizian l'è diventaa finalment imperador.
Diventaa el capp de l'imperi, el Domizian l'ha daa a la miee el titol de augusta e l'ha faa onorà el fioeu mòrt come on dio. In del 83 la Domizia l'è stada casciada per on poo del palazz: el Svetòni el diseva che quèst el gh'aveva come motiv la soa infedeltaa, ma i stòrich modern pensen che el motiv el sia staa che lee la riessiva nò a fà di fioeu. Dòpo questa crisi, l'ha vivuu in del palazz imperial finna a la mòrt del marii a causa de ona congiura. Gh'è chi el dis che la Domizia la gh'avess di connession con i congiuraa, ma anca questa ipòtesi l'è minga considerada vera di stòrich del dì d'incoeu.
De la mòrt del Domizian, la Domizia l'ha vivuu de privada e l'è mòrta tra el 126 e 'l 130.