Eat The Phikis
(Rimandad de Eat the Phikis)
Eat the Phikis l'è on album del grupp milanes Elio e le Storie Tese. L'è staa publicaa in del 1996, dòpo la partecipazion del grupp al Festival de Sanrem con la canzon "La Terra dei Cachi" (rivada segonda, anca se se dis che la sariss dovuda vess prima, ma che per di imbrojad de la giuria l'è stada penalizada). El disch, che 'l cunta i partecipazion de cantant comè l'Enrico Ruggeri, la Giorgia, el James Taylor e l'Edoardo Vianello (e anca del còmich Aldo Baglio), l'ha vinciuu el disch de platin e l'ha venduu pussee de 200000 còpi.
| Eat The Phikis | |||||
|---|---|---|---|---|---|
| Album in Studi | |||||
| Surtii | 1996 | ||||
| Gener | rock | ||||
| Furmaa | CD | ||||
| Dürada | 69:45 min. | ||||
| Cà discugrafiga | Aspirine/Bmg | ||||
| crunulugia di album de Elio e le Storie Tese | |||||
|
|||||
|
«Italia sì, Italia no, Italia gnamme: Se famo dù spaghi!
Italia sob, Italia pròd: la Terra dei Cachi! Una pizza in compagnia, una pizza da solo, in totale fan due pizze e l'Italia è questa qua!» |
(La Terra dei Cachi)
|
Lista di canzon
Modifega- Vincitori o campioni?
- La terra dei cachi (live in Sanremo)
- Burattino senza fichi
- T.V.U.M.D.B.
- Lo stato A, lo stato B
- El Pube
- Omosessualità
- Mio cuggino
- First me, second me
- Milza
- Li immortacci
- Tapparella
- Neanche un minuto di non caco
Curiosità
Modifega- Vincitori o campioni? a l'è on'introduzion a la canzon dòpo. Se senten i vôs del Pippo Baudo e de la Sabrina Ferilli, che presentaven el Festival in de l'edizion del 1996, pòcch prima de l'esibizion di Elio e le Storie Tese.
- La terra dei cachi l'è ona lista di difett e stereòtip de l'Itàlia (mafia, sangu infett de HIV in di ospedai, pizza, folbal, spaghetti...). A l'era ona canzon different de quij che eren cantaa normalment al Festival e fòrsi per quèst l'è rivada segonda. La registrazion l'è stada fada pròpri duranta la sò segonda esibizion a Sanrem.
- Burattino senza fichi l'è ona parodia del liber Pinocchio del Carlo Collodi, ò anca del CD Burattino senza fili del cantant napoletan Edoardo Bennato.
- T.V.U.M.D.B. l'è on duett tra l'Elio e la Giorgia.
- Lo Stato A, lo Stato B la cunta la participazion de l'Enrico Ruggeri, che 'l cita Quello che le Donne Non Dicono, canzon scrivuda pròppi de lù.
- El Pube a l'è ona canzon fada cont on stil latino e che la parla di ventur de on pilòta piazzista ciamaa El Pube (nòmm che 'l fà pensa al calciador sudamerican Diego Armando Maradona, soranomenaa "El Pibe de Oro", var a dì El Pè d'Òr). A on certo pont se sent ciamà on tal "Renato", che però l'è minga alter che 'l pianista Rocco Tanica, che se faseva ciamà, al temp, Renato Tinca ò anca René (defatt dòpo che se sent "Renato!" a gh'è on moment strumental de pianofòrt).
- Omossessualità a l'è ona canzon metal dedicada al tema de l'òmosessualità. El bassista Faso, che l'ama minga quell gener musegal, l'ha refudaa de sonàgh, donca el bass a l'è sonaa de l'Elio. Se senten i imitazion di vos de l'Amanda Lear (ona leggenda metropolitana la voeur che in realtà la fudess nassuda mas'c) e de Stan Laurel e Oliver Hardy.
- Mio cuggino l'imita el lenguagg di giovin che quand che voeuren minaccià di compagn parlen di azion del sò cusin pussee grand, despess inventaa ò esageraa.
- First me, second me, canzon dividuda in dò part:
- First me: cantada de l'Elio, a l'è scrivuda in d'on Ingles quas corrett ma parnonziaa malissim. El cantant el dis de vorè scriv ona canzon in Ingles per podè trovà ona tosa e donca grazie a the original sound of the wonderful Beatles English sposàlla e fàgh insema on mucc de bagaj. E poeu a la fin lé la morirà, menter lù el restarà viv fina a la fin del mond, come i personagg del film Highlander.
- Second me: in realtà la sariss la prima stròfa de ona veggia canzon del grupp, The peak of the mountain, che l'è scrivuda in d'on Ingles pròppi maccherònich (How you call you?/How many years you have?). E, per aumentà la comicità de la canzon, el cantant a l'è el James Taylor, cantautor statunitens.
- Milza
- Li immortacci: canzon cantada con la Giorgia e l'Edoardo Vianello (coautor) l'è el cunt de come i vari cantant mòrt (Elvis Presley, Freddie Mercury, Jimi Hendrix, Jim Morrison, Louis Armstrong, John Lennon) in realtà sien ancamò viv e resident a Roma, indove fann ona gran vita. Per quest la lengua doprada a l'è el dialett romanesch.
- Tapparella: voeuna di canzon pussee famos del grupp, la parla de la triste condizion di quij bagaj che vegnen minga invitaa aj fest, in de l'età di scoeul medi. El ritornell (Forza Panino), dòpo la mòrt del Feiez (1998), el diventarà el simbol del ricòrd che a tucc i concert i Elio e le Storie Tese voeuren portà al pòlistrumentista cremasch. El someja che la canzon la fuss stada giamò scritta in del 1994.
- Neanche un minuto di non caco: la version de la Terra dei Cachi cantada in 55 segond. Dòpo la canzon, gh'hinn vari ghost tracks.