Efesit Capitel Ses

Quel articul chì l'è scrivüü in Lumbard, cun l'urtugrafia insübrica ünificada.

Efesit

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Ses

¹I bagaj, übedii i voster gént in del Signúr: già che chèst l'è giüst. ²«Unura tò pader e tua mader», el qual l'è la prima cumandamént cun prumèssa, ³«perchè 'l sia bén a tì e te gh'àbiet lunga vita sü la tèra».
⁴E i pader, fee no rabiaa i voster bagaj ma tireej sü in de la cureziún e la visada del Signúr.
⁵I sèrv, übedii a i voster padrún segund la carna cun pagüra e tremúr in de la simplicitaa del voster cör cumè a Crist, ⁶no in del servizi quand veden, cumè lur che piasen i omen, ma cumè sèrv de Crist, fasend la vuluntaa de Diu de l'anemm, ⁷servend cun buntaa cumè al Signúr e no a i vèss üman, ⁸savend che se ognidün el faga qualsessìa bona cossa, el sarà recumpensaa cun chèst del Signúr, sia sèrv che liber. ⁹E i padrún, fee 'l medemm cun lur: metii via i minacc, perchè savii che 'l Signúr sia de lur che voster l'è in di cél e e gh'è minga distinziún di personn arént a lü.
¹⁰Del rest, feev fort in del Signúr in de la forza de la sua puténza. ¹¹Vestiiv de l'intrega armadüra de Diu perchè poduv stà sald cuntra la falsitaa del diàul: ¹²perchè gh'èmm no la lota cuntra sangh e carna ma cuntra i prenzipi, cuntra i auturitaa, cuntra i duminadúr de chèst scür, cuntra i spirit del mal in di lögh del cél. ¹³Per chèst, ciapee sü l'intrega armadüra de Diu, perchè poduv resist in del dì malign e stà sald despö che tüsscoss hinn staa cumpii. ¹⁴Dunca, stee sald despö che ve scengii i voster fianch cun la veritaa, vestii cun la curaza de la giüstizia, ¹⁵imbragaa i pee cun la pruntéza del vangel de la pas, ¹⁶ciapaa sü in de tüsscoss el scüd de la féd, cunt el qual pudarii smurzà tücc i saètt brüsant del malign; ¹⁷e ricevii l'elmu de la salvéza e la spada del Spirit, che l'è la parola de Diu. ¹⁸Pregand per ogni uraziún e preghéra in d'ogni témp in del Spirit, e per chèst descantanduv cunt ogni perseveranza e preghéra per tücc i sant, ¹⁹e per mì, che el me daga una parola quand dervi la mia buca cun franchéza per fà savüü el misteri del vangel, ²⁰per el qual sunt un ambassadúr in di cadenn, che 'n parli francamént, cumè l'è necessari che mì parli.
²¹E perchè savuv anca vialter i coss sü mì, che coss che fuu, Tichich, el fradèll predilètt e minister fedél in del Signúr, el ve farà savüü tüsscoss, ²²el qual v'huu mandaa per chèsta resún, perchè savuv i coss sü nümm e 'l daga curagg a i voster cör.
²³La pas la sia a i fradèj e bén cun féd de Diu Pader e Signúr Gesü Crist. ²⁴La grazia la sia cun tücc che vören bén el noster Signúr Gesü Crist cun sinceritaa.

Navigaziun

• ← Indree a Capitel Cinch
• Inanz a Filipes Capitel Vün →
• A l'indes