Efesit Capitel Vün

Quel articul chì l'è scrivüü in Lumbard, cun l'urtugrafia insübrica ünificada.

Efesit

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vün

¹Paül, un apostul de Crist Gesü, per la vuluntaa de Diu, a i sant che hinn a Efes, e i fedèj in de Crist Gesü, ²grazia a vialter e pas de Diu, noster Pader, e 'l Signúr Gesü Crist.
³Benedii l'è 'l Diu e pader del noster Signúr Gesü Crist, che 'l m'ha benedii cunt ogni benediziún spiritüala in di lögh di cél in de Crist, ⁴cumè 'l m'ha scernii in de lü prima de la fundaziún del mund che sium sant e sénza smàgia denanz de Lü in del bén, ⁵quand el m'ha numinaa prima a l'aduziún per mèzz de Gesü Crist a Lü segund el piasè de la sua vuluntaa, ⁶al lod de la gloria de la sua grazia la qual el m'ha daa liberamént in de lü che l'è staa vurüü bén.
⁷In del qual gh'èmm la redenziún per mèzz del sò sangh, el perdon di pecaa, segund la richéza de la sua grazia ⁸che l'è vegnüü in de bundanza a nümm in de tüta la saviéza e cugnussénza, ⁹quand el gh'ha faa cugnussüü a nümm el misteri de la sua vuluntaa segund el sò piasè che l'ha metüü prima in de lü ¹⁰a la ministraziún de la pienéza di témp, che tüsscoss sien metüü in soma in de Crist, i coss in di cél e sü la tèra, ¹¹in de lü. In del qual anca sèmm staa faa ered, già che sèmm staa destinaa prima segund el pruposit che l'opera tüsscoss segund el cunsili de la sua vuluntaa ¹²perchè sium al lod de la sua gloria nümm che èmm speraa prima in de Crist, ¹³in del qual anca vialter, quand avii sentii la parola de la veritaa, el vangel de la vostra salvéza in del qual anca avii credüü, sii staa segnaa cunt un sigill cunt el Spirit Sant de la prumèssa, ¹⁴che l'è la capara de la nostra ereditaa, a la redenziún de la pruprietaa, al lod de la sua gloria.
¹⁵Per chèst, anca mì, perchè huu sentii de la féd intra vialter in del Signúr Gesü e chèla a tücc i sant, ¹⁶desmeti no de dà grazi per vialter, intanta che ve regurdi in di mè preghiér, ¹⁷che el Diu del noster Signúr Gesü Crist, el Pader de la gloria, el ve daga un spirit de la saviéza e revelaziún in de la sua cugnussénza, ¹⁸despö che l'ha daa lüs a i öcc del voster cör perchè sapiuv che cossa l'è la speranza de la sua ciamada, che cossa l'è la richéza de la gloria de la sua ereditaa in di sant, ¹⁹e che cossa l'è la grandéza ultra misüra del sò pudè a nümm che credum segund l'ativitaa de la puténza de la sua forza, ²⁰che l'ha metüü in d'att in de Crist, quand el gh'ha levaa sü di mort e 'l gh'ha faa setaa giò a la sua driza in di lögh del cél ²¹sura ogni prenzipi, auturitaa, puténza, padrunanza e ogni nomm che l'è numinaa, no dumà in de chèst secul, ma in del secul che l'è dree a vegnì; ²²e l'ha sutametüü tüsscoss suta i sò pee e 'l gh'ha daa capp sura tüta la gésa, ²³che l'è 'l sò corp, el cumpì de lü che cumpi tüsscoss in de tücc.

Navigaziun

• ← Indree a Galata
• Inanz a Capitel Düü →
• A l'indes